Qazaqstan benzın baǵasy eń arzan elder qataryna endi — jahandyq reıtıng
ASTANA. KAZINFORM - Qazaqstan benzınniń qoljetimdiligi boıynsha álemdegi aldyńǵy qatarly elderdiń qataryna kirdi. Reıtıngte el Lıvııa jáne Venesýelamen qatar tur, bul memleketterde janarmaıdyń arzandyǵy tabıǵı resýrstarǵa baılanysty qalyptasqan, dep habarlaıdy Kazinform GlobalPetrolPrices derekterine silteme jasap.
GlobalPetrolPrices málimetinshe, 2026 jylǵy 16 naýryzdaǵy jaǵdaı boıynsha Qazaqstanda AI-95 benzıniniń baǵasy lıtrine shamamen 0,51 dollardy quraıdy. Bul — álemdik ortasha kórsetkishten (1,37 dollar) shamamen úsh ese tómen.
Jahandyq reıtıngte Qazaqstan janarmaı baǵasy resýrstyq baza nemese memlekettik sýbsıdııalar esebinen tómen saqtalyp otyrǵan eldermen qatar ornalasqan. Olardyń qatarynda Lıvııa, Iran, Venesýela, sondaı-aq Kýveıt, Aljır, Túrikmenstan, Mysyr, Qatar, Saýd Arabııasy, Bahreın jáne Oman bar.
Bul elderdiń bir bóligi janarmaı baǵasyn áleýmettik saıasat quraly retinde tómen deńgeıde ustap otyr. Alaıda mundaı model kóbine shıkizat sektoryna táýeldiliktiń joǵary bolýymen qatar júredi. Qazaqstan bul qatarda salystyrmaly túrde turaqty kóringenimen, baǵa qalyptastyrý logıkasy uqsas — negizgi róldi memlekettik retteý atqarady.
Ekonomısterdiń aıtýynsha, resýrstar baǵasynyń uzaq ýaqyt tómen deńgeıde saqtalýy jaýapsyzdyqtyń qalyptasýyna ákelýi múmkin. Arzan benzın birqatar júıeli saldar týdyrady:
• birinshiden, bıýdjet pen munaı óńdeý salasyna qysym túsedi. Tómen marja jańǵyrtý men ınvestıtsııa múmkindigin shekteıdi;
• ekinshiden, ishki tutyný artady. Bul joldarǵa túsetin júktemeniń kúsheıýine, shyǵaryndylardyń kóbeıýine jáne ınfraqurylymnyń tez tozýyna alyp keledi;
• úshinshiden, kórshi eldermen baǵa aıyrmashylyǵy paıda bolyp, janarmaıdyń zańdy jáne kóleńkeli joldarmen elden tys ketýine jol ashady.
Uzaq merzimdi perspektıvada bul faktorlar ekonomıkanyń jalpy tıimdiligin tómendetip, benzın baǵasynda tikeleı kórinbeıtin qosymsha shyǵyndarǵa ákelýi múmkin.
Damyǵan elderde jaǵdaı kerisinshe. Eýropa, Japonııa jáne Ońtústik Koreıada benzın baǵasy aıtarlyqtaı joǵary — kóbine lıtrine 3 dollardan asady.
Bul memleketterdiń saıasatyna baılanysty: joǵary baǵa salyqtar esebinen qalyptasyp, ınfraqurylymdy damytýǵa, ekologııalyq jobalarǵa jáne qoǵamdyq kólikke baǵyttalady. Osylaısha, damyǵan ekonomıkalarda qymbat benzın — másele emes, retteý jáne turaqty damý quraly retinde qarastyrylady.
Qazaqstan úshin janarmaıdyń tómen baǵasy mańyzdy áleýmettik faktor bolyp qala beredi. Ol halyqty qoldap, ásirese logıstıka men aýyl sharýashylyǵy salalaryndaǵy bıznes shyǵyndaryn azaıtady. Alaıda sonymen qatar sala tıimdiligin kezeń-kezeńimen arttyrý mindeti tur. Bul — qoljetimdilik pen naryqtyq tetikter arasyndaǵy tepe-teńdikti tabý qajettigin bildiredi.
Sarapshylardyń pikirinshe, qazirgi model qysqa merzimde saqtalýy múmkin, alaıda uzaq merzimde baǵa qalyptastyrýǵa neǵurlym ıkemdi tásil qajet bolady. Qazaqstan búginde benzıni eń qoljetimdi elderdiń qatarynda, bul aıtarlyqtaı ekonomıkalyq artyqshylyq beredi. Degenmen basty mindet — bul artyqshylyqtyń ekonomıkalyq tıimdilikti tómendetetin faktorǵa aınalyp ketpeýin qamtamasyz etý.
Buǵan deıin QR Energetıka mınıstri benzın baǵasynyń kúrt ósýine jol berilmeıtinin aıtty.
