Qazaqstan Belız memleketimen vızasyz rejım ornatýda

ASTANA. QazAqparat – Qazaqstan Belız memleketimen vızasyz rejım ornatýda. Atalǵan másele Qazaqstannyń Syrtqy ister mınıstrliginde ótken onlaın konsýltatsııa barysynda talqylandy, dep habarlaıdy QazAqparat.

«QR Syrtqy ister mınıstrligi Konsýldyq qyzmet departamentiniń dırektory Baýyrjan Aqataev Belız Syrtqy ister mınıstrliginiń Halyqaralyq qatynastar jáne yntymaqtastyq departamentiniń dırektory Orla Kantýn Kolmanmen alǵashqy konsýldyq konsýltatsııalar ótkizdi.

Taraptar dostyq qarym-qatynastardy odan ári nyǵaıtý múmkindigin úlken qyzyǵýshylyqpen atap, alǵashqy ári mańyzdy qadamdardyń biri retinde eki eldiń dıplomatııalyq, resmı jáne qyzmettik pasporttarynyń ıeleri úshin vızalyq rejımdi jeńildetý týraly úkimetaralyq kelisimge qol qoıýǵa ýaǵdalasty», - delingen QR SІM málimetinde.

B. Aqataev Qazaqstannyń syrtqy saıası vedomstvosynyń Karıb qoǵamdastyǵy (CARICOM) óńirimen túrli salalardaǵy baılanystardy odan ári tereńdetý nıeti týraly jáne úkimetaralyq qujattarǵa qol qoıý onyń tikeleı rastaýy bolyp tabylatynyn jetkizdi.

Óz kezeginde O. Kantýn Kolman eki el arasyndaǵy qarym-qatynasta tańdalǵan baǵyttyń mańyzdylyǵyna nazar aýdaryp, halyqaralyq shartty tez arada kelisýge bar kúshin salýǵa daıyn ekenin bildirdi.

Foto: QR SІM baspasóz qyzmeti