Qazaqstan Belgııanyń mýzykalyq aspaptar murajaıyna dombyra men sazsyrnaı syılady

ASTANA. KAZINFORM – Beısenbi kúni Qazaqstan elshiliginiń qoldaýymen Belgııa mýzykalyq aspaptar murajaıyna qazaqtyń ulttyq aspaptary - dombyra men sazsyrnaı tapsyrý rásimi ótti, dep habarlaıdy Kazinform menshikti tilshisi.

Aspaptardy QR Elshiligi «Alataý Áýenderi» kontserttik uıymymen birlesip syıǵa tartty, bul Qazaqstan men Belgııa arasyndaǵy mádenı dıalogty nyǵaıtýdaǵy mańyzdy qadam boldy.
Saltanatty rásim barysynda Almaty oblysynyń Qulansaz ansambliniń mýzykanttary qazaq kúıleri men áýenderin oryndap, aspaptar kórmege qoıylmas buryn murajaıǵa kelýshilerge olardyń dybystalýyn tanystyrdy.

Dombyra men sazsyrnaı murajaıdyń turaqty kollektsııasynyń bir bóligine aınalady jáne sandyq túrde – onlaın katalog pen aýdıogıd túrinde qoljetimdi bolady, onda kelýshiler árbir aspaptyń oınalýyn tyńdap, olardyń shyǵý tegi men mádenı mańyzy týraly bile alady.

Belgııa mýzykalyq aspaptar murajaıynyń ókili Saskııa Vıllaert eksponattardy syıǵa tartýdyń mańyzdylyǵyn atap ótti. 

- Bul aspaptar bizdiń murajaıymyzdy baıytyp, kelýshilerge álemniń taǵy bir jarqyn mýzykalyq dástúrin ashýǵa múmkindik beredi. Biz Qazaqstanǵa osy úlesi úshin alǵys aıtamyz jáne dombyra men sazsyrnaı aspaptaryn keń aýdıtorııaǵa usynýǵa qýanyshtymyz, - dedi ol.

Belgııa mýzykalyq aspaptar murajaıy (MIM) 1877 jyly qurylǵan Koroldik óner jáne tarıh murajaılarynyń bir bóligi jáne búginde shamamen 8 myń aspaptan turatyn keń kollektsııasy, sondaı-aq Brıýsseldiń sáýlet eskertkishteriniń biri bolǵan tarıhı ar-nývo ǵımaratynyń arqasynda álemdegi jetekshi mýzyka murajaılarynyń biri sanalady.

Eske sala ketsek, Qazaqstan mádenıeti aptalyǵy aıasynda Eýropa astanasynda «Alataý áýenderi» kontserti ótti.