Qazaqstan-Belgııa: Mýzeıler baılanysty nyǵaıtyp, vızalyq talaptar jeńildeıdi
ASTANA. KAZINFORM – Memleket basshysy Qasym-Jomart Toqaev BAQ ókilderine Belgııa Koroldigimen mádenı-gýmanıtarlyq salada qol jetkizilgen ýaǵdalastyqtar jóninde áńgimeledi.
– Elderimizdiń ýnıversıtetteri, mýzeıleri men mádenı mekemeleri arasynda tikeleı baılanys ornatýǵa, sonymen qatar birlesken bilim berý baǵdarlamalaryn damytýǵa jáne akademııalyq tájirıbe almasýǵa nıetti ekenimizdi rastadyq. Djeıms Ensordyń tanymal týyndylaryn Qazaqstannyń Ulttyq mýzeıinde tanystyrǵan belgııalyq seriktesterimizge alǵysym sheksiz. Sondaı-aq Almaty Museum of Arts pen KANAL-Centre Pompidou arasyndaǵy yntymaqtastyqty ilgeriletýdi qoldaımyn. Ol Belgııanyń shyǵarmashylyq áleýetin jáne mádenı salany damytýǵa umtylysyn kórsetedi. Atalǵan bastamalar Belgııanyń baı kórkem murasymen tanysýǵa, halyqtarymyzdyń bir-birimen jaqyn aralasýyna jol ashady. Qyzmettik pasport ıelerin vıza talaptarynan bosatý jónindegi kelisimge ózgerister engizýdiń arqasynda barys-kelisimizdi birshama jeńildetýge qol jetkizdik. Búgin qabyldanǵan Birlesken málimdeme ortaq mindetterge saı keledi, – dedi Memleket basshysy.
Prezıdent taraptardyń halyqaralyq jáne óńirlik ózekti máseleler jóninde pikir almasqanyn aıtty.
– Qazaqstan men Belgııa halyqaralyq quqyq normalaryn saqtaýǵa, kópjaqty yqpaldastyqty nyǵaıtýǵa jáne qaqtyǵystardy beıbit jolmen retteýge beıil. Jahandyq ahýal qubylyp turǵan qazirgi kezde dıalog, ózara senim men jaýapty dıplomatııa erekshe ózekti. Jýyrda meniń Brıýsselge saparym aıasynda Qazaqstan men Eýropalyq odaq arasyndaǵy strategııalyq seriktestiktiń mańyzdy ekenin rastadyq. Ol arnaıy kelisimde bekitildi, – dedi Qasym-Jomart Toqaev.
Memleket basshysy osy mınýttarda Brıýsseldiń ortalyq alańy Gran-Plasta, qalalyq ratýsha ǵımaratynyń aldynda alǵash ret Qazaqstannyń Memlekettik Týy kóterilgenin atap ótip, ystyq yqylasy men sımvolıkalyq mánge ıe qurmeti úshin belgııalyq áriptesine alǵys aıtty.
– Belgııanyń «L’union fait la force» degen ulttyq urany qazaqtyń «Birlik bar jerde tirlik bar» degen támsilimen maǵynalas. Bizdiń dostyǵymyz osy ortaq qundylyqtarǵa negizdelgen. Atalǵan memlekettik sapar Qazaqstan-Belgııa qarym-qatynasyn ilgeriletýde betburysty sát bolatynyna senimdimin. Qazaqstan halqy Sizdiń meıirimdi, bekzat ári parasatty bolmysyńyzdy árdaıym qurmet tutady, – dedi Prezıdent.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar – asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Belgııanyń federaldyq mınıstri Jan-Lıýk Krıýıke qazaqstandyqtar qyzmettik pasportpen Eýropanyń úsh eline vızasyz bara alatynyn málimdegen edi.
Ǵylym jáne joǵary bilim mınıstri Saıasat Nurbek Belgııanyń 12 ýnıversıtetimen kelisimshart ornatylatynyn aıtty.
