Qazaqstan belgilegen maqsatyna jetý úshin mańyzdy qadamdar jasap keledi – AQSh sarapshysy

ASTANA. QazAqparat – Qazaqstandaǵy bıylǵy saılaý ashyq ótti. Bul týraly «QSZI GPS» saraptama alańynyń otyrysynda New Lines strategııa jáne saıasat ınstıtýtynyń (AQSh) analıtıka jónindegi dırektory Kamran Boharı málim etti, dep habarlaıdy QazAqparat tilshisi.

«Bul saılaý shynymen de Qazaqstannyń postkeńestik memleketten jańa formaǵa ótýiniń óte mańyzdy kezeńi bolyp otyr. Qasym-Jomart Toqaev daıyndaǵan qadamdar aıasynda eldi ózgertýdiń belgili bir jol kartasy bar. Árıne, ony júzege asyrý úshin biraz ýaqyt kerek. Eger bári oıdaǵydaı bolsa, múlde jańa kandıdattar, eldiń saıası alańynda óz rólin atqaryp, óz ornyn alyp jatqan partııalar qyzmet etedi», - dedi Kamran Boharı.

Sarapshy Qazaqstandaǵy bıylǵy saılaý ashyq ótkenin atap ótti.

«20 qarashada 10 saılaý ýchaskesin araladym jáne eshqandaı kedergiler men qıyndyqtar anyqtalǵan joq. Saılaýǵa kelgen halyq ne isteý kerektigin bilip, daýys berý rásiminen habardar boldy», - dedi ol.

Osy oraıda K.Boharı biraz saılaýshymen pikir almasqanyn, olardyń kópshiligi saılaýda daýys berý arqyly ózderiniń azamattyq mindetin oryndap jatqanyn jáne memleket aýqymyndaǵy is-sharaǵa óz úlesterin qosýǵa qýanyshty ekendikterin aıtqanyn jetkizdi.

Sarapshynyń sózine qaraǵanda, Qazaqstan úshin júrgizilip jatqan reformalardyń mańyzy zor. Bul turǵyda Qazaqstan maqsatqa jetý úshin barlyq múmkindikti paıdalanyp, mańyzdy qadamdar jasalyp keledi.