Qazaqstan Belarýske joǵary qosylǵan quny bar ónim eksportyn ulǵaıtpaq
ASTANA. KAZINFORM — Qazaqstan Respýblıkasynyń Aýyl sharýashylyǵy mınıstri Aıdarbek Saparov Eýrazııalyq ekonomıkalyq odaqtyń Agroónerkásiptik saıasat jónindegi keńesiniń 7-otyrysy aıasynda Belarýs Respýblıkasynyń Aýyl sharýashylyǵy jáne azyq-túlik mınıstri ıÝrıı Gorlovpen ekijaqty kelissózder júrgizdi.
Vedomstvonyń habarlaýynsha, taraptar agroónerkásiptik keshen salasyndaǵy yntymaqtastyqty odan ári damytýdyń negizgi baǵyttaryn talqylady.
2025 jyldyń qorytyndysy boıynsha Qazaqstan men Belarýs arasyndaǵy agroónerkásiptik keshen ónimderiniń ózara saýda kólemi 365 mln AQSh dollaryna jetip, aldyńǵy jylmen salystyrǵanda 31% ósti. Oń dınamıka 2026 jyly da saqtalyp otyr: qańtar–mamyr aılarynda agroónerkásiptik ónimderdiń taýar aınalymy taǵy 18% artty.
Qazaqstan úshin agrarlyq eksportty ártaraptandyrý jáne tereń óńdelgen ónimderdiń úlesin arttyrý negizgi basymdyqtardyń biri bolyp qala beredi. Búginde Qazaqstannyń agroónerkásiptik keshen ónimderi eksportynda qaıta óńdelgen ónimderdiń úlesi 51%-dan asady.
Osyǵan baılanysty Qazaqstan tarapy Belarýs naryǵyna qosylǵan quny joǵary ónimder jetkizilimin keńeıtýge múddeli.
Perspektıvaly baǵyttardyń qatarynda kúnbaǵys jáne maqsary maıy, daıyn azyq-túlik ónimderi, sondaı-aq raps, kúnbaǵys jáne zyǵyrdy qosa alǵanda, dándi jáne maıly daqyldar bar.
— Biz agrarlyq eksport kólemin ulǵaıtý jáne onyń qurylymyn qosylǵan quny joǵary ónimder esebinen keńeıtý baǵytynda júıeli jumys júrgizip kelemiz. Qazaqstanda Belarýs naryǵyn turaqty jetkizilimdermen qamtamasyz etý úshin qajetti shıkizat bazasy, óndiristik qýattar jáne eksporttyq áleýet bar, — dep atap ótti mınıstr.
Óz kezeginde Belarýs tarapy agroónerkásiptik keshenniń perspektıvaly baǵyttary boıynsha yntymaqtastyqty keńeıtýge múddeli ekenin bildirdi.
Ósimdik sharýashylyǵy salasyndaǵy yntymaqtastyqqa erekshe nazar aýdaryldy. Atap aıtqanda, selektsııa jáne tuqym sharýashylyǵy, zamanaýı agrotehnologııalardy engizý, tsıfrlyq sheshimder men ınnovatsııalar salalarynda tájirıbe almasýdy jandandyrý usynyldy. Mal sharýashylyǵy salasyndaǵy ózara is-qımyl da perspektıvaly baǵyttardyń biri bolyp qala beredi.
Qazaqstan etti mal sharýashylyǵy salasyndaǵy óziniń tájirıbesimen bólisýge daıyn. Elimizde zamanaýı bordaqylaý alańdaryn qurý boıynsha iri jobalar iske asyryldy. Olardyń qýaty 50 myń basqa deıin jetedi. Sonymen qatar bir mezgilde 10 myń jáne odan da kóp mal basyn ustaýǵa arnalǵan iri óndiristik alańdar jelisi belsendi damyp keledi.
Ózara is-qımyldy praktıkalyq turǵyda úılestirý aýyl sharýashylyǵy salasyndaǵy yntymaqtastyq jónindegi Qazaqstan-Belarýs birlesken jumys toby aıasynda júzege asyrylady.
Eske salaıyq, munyń aldynda Qazaqstanda taýar eksporty men ımportyna ruqsat berý tártibi engiziletinin habarlaǵan edik.
