Qazaqstan Belarýske $30 mln-ǵa kommertsııalyq tehnıka jetkizedi
ASTANA. KAZINFORM – «Innoprom. Belarýs» forýmy aıasynda Qazaqstan – Belarýs iskerlik keńesiniń otyrysy ótti. Kezdesý barysynda qazaqstandyq kompanııalar belarýstik seriktesterimen ónim jetkizýdi ulǵaıtýǵa baǵyttalǵan birqatar kelisimge keldi. Jumysqa Qazaqstan Saýda jáne ıntegratsııa mınıstrligi men «QazTrade» saýda saıasatyn damytý ortalyǵy» AQ qoldaý kórsetti.
Negizgi kelisimderdiń biri – qazaqstandyq kommertsııalyq tehnıkany Belarýske jetkizý. «Hyundai Trans Auto» JShS men Belarýstiń «Er Sı M» JShQ 2027–2028 jyldary 790 birlik tehnıka jetkizý týraly kelisimge keldi. Kelisimniń jalpy quny keminde $30 mln bolady. Sonymen qatar qazaqstandyq avtokólik óndirýshileriniń Belarýs naryǵyndaǵy eksporttyq áleýeti jylyna 4 500 birlik tehnıkaǵa deıin jetedi.
Qazaqstandyq ónimdi Belarýs naryǵynda ilgeriletý maqsatynda taǵy 1 kelisim jasaldy. Qazirdiń ózinde eksporttaýshylar pýly qalyptastyrylyp, jylyna 20 júk kóligine deıin taýar jetkizý múmkindigi qarastyrylyp jatyr.
Saýda jáne ıntegratsııa mınıstrligi málimetinshe, eki el arasyndaǵy saýda kólemi de turaqty ósip keledi. 2025 jyldyń qorytyndysy boıynsha Qazaqstan men Belarýs arasyndaǵy taýar aınalymy 30%-ǵa ósip, $1,2 mlrd-tan asty. 2026 jyldyń qańtar–shilde aılarynda ózara saýda taǵy 20,5%-ǵa ósip, $723 mln boldy. Onyń ishinde Qazaqstan eksporty $180,3 mln, ımport $542,7 mln boldy. Osy kezeńde Qazaqstannyń agroónerkásiptik kesheni ónimderiniń Belarýske eksporty 34,9%-ǵa ósip, $24,9 mln-ǵa jetti.
Endigi mindet – osy ósimdi naqty eksporttyq jobalarmen bekitý. Qazaqstan men Belarýs ónerkásip, mashına jasaý jáne agroónerkásiptik keshen salalaryndaǵy birqatar joba boıynsha jumys istep jatyr. Qazaqstan ónimderiniń Belarýs naryǵyndaǵy qosymsha eksporttyq áleýeti $80,1 mln-ǵa baǵalanady.
2026 jyldyń qańtarynda Mınskide Qazaqstannyń «Qazaq Treıd Haýs» saýda úıi jumysyn bastady. Ol qazaqstandyq taýarlardy Belarýs naryǵyna shyǵarýǵa jáne eksporttyq jobalardy súıemeldeýge múmkindik beredi. Qazir munda segiz qazaqstandyq óndirýshiden turatyn jetkizýshiler pýly qalyptastyrylǵan. Onyń ishinde jylyna 20 júk kóligine deıin, jalpy quny $300 myńǵa deıin ónim jetkizý múmkindigi bar.
Azyq-túlik ónimderi boıynsha Belarýstiń eń iri saýda jelileriniń biri «Evrooptqa» taýar jetkizý máselesi pysyqtalýda. Qazirdiń ózinde ósimdik maıy, sút ónimderi, sýsyndar, mıneraldy sý, un, jarma jáne et konservilerin jetkizý múmkindikteri qarastyrylyp jatyr.
Temirjol-mashına jasaý salasynda da baılanys jolǵa qoıylǵan. «Prommashkomplekt» JShS Belarýske tutas ılemdelgen temirjol dóńgelekterin jetkizip keledi. Al «Railways Systems Holding» JShS vagondar, relsti avtobýstar, qosalqy bólshekter jáne basqa da ónimderdi jetkizý boıynsha kelissózder júrgizip jatyr.
Budan bólek, Qazaqstanda birlesken óndirister qurýǵa baǵyttalǵan eki joba pysyqtalyp jatyr. «POJSNAB» JShQ men «Avtokomponenty KZ» JShS arnaıy órt sóndirý tehnıkasyn óndirýdi josparlap otyr. Al «Qaz-Bel Lıft» JShS men «Mogılevskıı zavod lıftovogo mashınostroenııa» AAQ Aqtóbede lıft óndirisin iske qosý múmkindigin qarastyryp jatyr.
Aldaǵy kezeńde taraptar naqty kelisimsharttarǵa basymdyq berip, qazaqstandyq ónimderdiń Belarýs naryǵyna jetkizilý kólemin ulǵaıtýdy kózdep otyr.
Aıta keteıik, Qazaqstan Belarýs pen reseılik áriptesterine jańa qutqarý tehnologııalaryn kórsetti.
