Qazaqstan, Belarýs, Reseı arasynda agroónerkásip keshenindegi ǵylymı-tehnıkalyq yntymaqtastyq týraly úshjaqty kelisim qabyldandy
áýirdiń 8-i. QazAqparat /Qanat Mámetqazyuly/ - Búgin «Kedendik odaq elderiniń agroónerkásiptik keshenin damytýdy ǵylymmen qamtamasyz etý» atty halyqaralyq konferentsııa barysynda Qazaqstan, Belarýs, Reseı arasynda agroónerkásip keshenindegi ǵylymı-tehnıkalyq yntymaqtastyq týraly úshjaqty kelisim qabyldandy.
«QazAgroInnovatsııa» AQ, Belarýs Ulttyq akademııasy, RF Aýyl sharýashylyǵynyń ǵylymı akademııasy arasynda qol qoıylatyn kelisim aýyl sharýashylyǵy salasyndaǵy zertteýler boıynsha yqpaldastyqty tereńdetý, agroónerkásiptik keshendegi aldyńǵy qatarly ǵylymı jetistiktermen almasý sharalaryn kózdeıdi, dep habarlaıdy QazAqparat.
Kedendik odaq aıasyndaǵy atalǵan memleketter boıynsha qabyldanatyn úshjaqty kelisimniń negizgi maqsaty agrotehnologııalar men zertteýlerdi ózara paıdalana otyryp agroónerkásip keshenin tıimdi damytý, jurtshylyqty sapaly azyq-túlikpen qamtamasyz etý bolyp tabylady. Kelisimde qamtylǵan maqsattarǵa qol jetkizý úshin úsh memleket arasyndaǵy agrarlyq salanyń ǵylymı uıymdary men sýbektileri ǵylymı-tehnıkalyq yntymaqtastyqty jandandyra túsetin bolady. Bul rette ǵylym men ǵylymı-tehnıkalyq qyzmetke, agrarlyq saladaǵy ınnovatsııalyq sharalarǵa, kadrlyq, onyń ishinde ǵylymı áleýetti arttyrýǵa basa mán beriledi.
