Qazaqstan Belarýs pen reseılik áriptesterine jańa qutqarý tehnologııalaryn kórsetti
ASTANA. KAZINFORM- Belarýs Respýblıkasynda Qazaqstan, Belarýs jáne Reseı tótenshe jaǵdaılar vedomstvolarynyń Birlesken alqasynyń XIII otyrysy ótti. Qazaqstan delegatsııasyn Tótenshe jaǵdaılar mınıstri Murat Muhanov basqardy, dep habarlaıdy QR Tótenshe jaǵdaılar mınıstrliginiń bapasóz qyzmeti.
Qazaqstan tarapy TJM bólimshelerinde qoldanylatyn otandyq ázirlemeler men tehnıkany tanystyrdy. Olardyń qatarynda shynjyr tabandy órt sóndirý roboty, kópfýnktsıonaldy robottandyrylǵan platforma, beıimdelgen órt sóndirý-qutqarý tehnıkasy, sondaı-aq baılanys pen basqarýdyń mobıldi keshenderi bar.
Qatysýshylarǵa ushqyshsyz tehnologııalar, tsıfrlyq monıtorıng jáne boljaý júıeleri, kúrdeli tabıǵı jaǵdaılarda jumys isteýge arnalǵan sheshimder jáne qutqarý avıatsııasynyń múmkindikteri kórsetildi. Ázirlemeler Qazaqstannyń erekshelikterin, sonyń ishinde úlken qashyqtyqtardy, dalalyq jáne taýly aýmaqtardy, orman alqaptaryn jáne iri ónerkásiptik nysandardy eskere otyryp ázirlengen.
Otyrys barysynda órt sóndirý-qutqarý tehnıkasyn damytý, zamanaýı tehnologııalardy qoldaný, elektr kóliginiń órt qaýipsizdigi jáne taý-ken qutqarý qyzmetteriniń jumysyna qatysty máseleler qaraldy.
Elektr kólikteriniń órt qaýipsizdigine erekshe nazar aýdaryldy. Qazaqstan tarapy elektromobılderdi sóndirý tásilderi men osyndaı oqıǵalar kezinde bólimshelerdiń is-qımyl tártibin tanystyrdy.
Tartý batareıalaryn salqyndatýǵa arnalǵan arnaıy quraldar, órtke qarsy jabyndar jáne zaqymdanǵan kólikterdi tasymaldaýǵa arnalǵan jabdyqtar qaraldy.
Elimizde avtokólik óndirýshilerdiń mamandaryn jumyldyra otyryp, jeke quramǵa praktıkalyq daıarlyq júrgizilip jatyr. Sonymen qatar Belarýs jáne reseılik áriptesterimen onlaın-semınarlar uıymdastyrylyp, ádistemelik usynymdar ázirlený ústinde.
Qazaqstan tarapy derekter almasýdy, birlesken synaqtardy jáne kelisilgen usynymdar ázirleý boıynsha jumysty jalǵastyrýdy usyndy.
Talqylaýdyń taǵy bir baǵyty taý-ken qutqarý qyzmetteriniń jumysyna arnaldy. Úsh eldiń ókilderi olardyń jumysyn uıymdastyrý jáne mamandardy daıarlaý máselelerin qarastyrdy.
Qaýipti óndiristik nysandardaǵy jumystyń ereksheligi men taý-ken qutqarý bólimshelerin daıarlaýǵa qoıylatyn talaptardy eskere otyryp, bul baǵyttaǵy praktıkalyq tájirıbe almasýdyń mańyzy zor.
Otyrys qorytyndysy boıynsha taraptar odan ári birlesken jumystyń baǵyttaryn belgiledi. Qazaqstan ǵylymı-tehnıkalyq jáne óndiristik kooperatsııany damytýǵa, tehnıkany birlesip synaqtan ótkizýge, sondaı-aq tehnologııalyq sheshimder men praktıkalyq tájirıbe boıynsha kásibı almasýdy jalǵastyrýǵa daıyn ekenin bildirdi.
Osyǵan deıin Qazaqstannyń TJM qutqarýshylary Tájikstan Respýblıkasynda ótetin jer silkinisteriniń saldary men klımattyq táýekelderge den qoıý boıynsha halyqaralyq kópjaqty oqý-jattyǵýǵa qatysatyny týraly jazdyq.
