Qazaqstan Belarýske 20 elektrovoz eksporttamaq
ASTANA. QazAqparat - Mınskide «Kazakh Invest» ulttyq kompanııasy Belarýs saýda-ónerkásiptik palatasymen birlesip qazaqstandyq óndirýshilerdiń saýda mıssııasyn ótkizdi, dep habarlady Kazakh Invest baspasóz qyzmeti.
«Shara aıasynda «Elektrovoz qurastyrý zaýyty» JShS ókilderi «Belarýs temir joly» basshylyǵymen kezdesti.
«EKZ» JShS bas dırektorynyń orynbasary Andreı Ershovtyń aıtýynsha, kezdesýde qazaqstandyq jolaýshylar elektrovozyn Belarýske jetkizý máselesi talqylandy. Belarýs temir joly qajettiligi úshin KZ4AT úlgidegi 20 jolaýshylar elektrovozyn eksporttaý josparlanýda»,- delingen habarlamada.
«KazAzot» JShS jáne «Temir-Servıs» JShS qazaqstandyq óndirýshileriniń Belarýs Respýblıkasynyń Aýyl sharýashylyǵy jáne azyq-túlik mınıstriniń orynbasary Vladımır Grakýnmen kezdesý qorytyndysy boıynsha qazaqstandyq kompanııalar Belarýs aýyl sharýashylyǵy qajettiligi úshin tyńaıtqyshtar jetkizýshi tizilimine engizildi.
Forým aıasynda qazaqstandyq azyq-túlik ónimderin óndirýshiler úshin «Vıtalıýr» iri belarýstik sýpermarketter saýda jelisiniń basshysymen kezdesý uıymdastyryldy. Kezdesý nátıjesi boıynsha osy jelige azyq-túlik ónimderin jetkizý týraly ýaǵdalastyqqa qol jetkizildi.
Atap ótsek, Kazakh Invest Mınskide saýda mıssııasyn altynshy ret ótkizýde. Shara qorytyndysy boıynsha 20 mln. AQSh dollaryna eksporttyq kelisimsharttar jasaldy.
