Qazaqstan-Belgııa matchy, syrǵanaý maýsymynyń ashylýy – elordada ótetin sharalar

Elorda ákimdiginiń aqparatyna sáıkes, «Kórme» ortalyǵynda «Qazaqstannyń úzdik taýary» respýblıkalyq kórme-baıqaýy ótedi. Úzdik taýar óndirýshi ataný úshin ár óńirden 9 ókilden, bas-aıaǵy 153 óndirýshi baq synaıdy. Shara otandyq taýarlardyń sapasyn arttyryp, ózindik brendti qalyptastyrý maqsatynda uıymdastyrylyp otyr. Kórmede qazaqstandyq óndirýshilerdiń nan, kondıterlik jáne sút ónimderi, jartylaı fabrıkattar, kıim-keshek, qurylys materıaldary, medıtsınalyq buıymdar, korpýstyq jıhaz jáne taǵy basqasy usynylady. Budan bólek, konkýrs aıasynda «Uly dala eli» forým ótedi.

Sondaı-aq 13 qazan kúni «Astana opera» teatrynda Djýzeppe Verdıdiń «Don Karlos» operasynyń premerasy bolady. Opera Qazaqstanda alǵash ret sahnalanady. Onyń qoıýshy-rejısseri ıtalııalyq Davıde Lıvermor. Ol 2019 jyldyń Opera Oskarynda «Úzdik rejısser» ataǵyna ıe bolǵan. Bastalýy saǵat 18:00-de, bıletter baǵasy 500 teńgeden bastalady.

Búgin «Alaý» muz aıdynynda jappaı syrǵanaý maýsymy ashylady. Sonyń qurmetine kelýshilerge syılyqtar tabystalyp, ártister óner kórsetedi. Chempıondyq muz aıdynynda kún saıyn saǵat 19:00-22:00 aralyǵynda (dúısenbiden basqa) syrǵanaýǵa bolady. Demalys jáne mereke kúnderi 5 seans qarastyrylǵan. Bul kúnderi saǵat 09:00-23:00 aralaǵynda kelýge bolady.

13 qazanda «Astana Arena» stadıonynda Qazaqstan men Belgııanyń ulttyq quramalary arasynda Eýropa champıonatynyń 2020 jylǵy irikteý týrnıri aıasyndaǵy matchtyq kezdesý ótedi. Oıyn saǵat 19:00 bastalady. Aıta keteıik, komandalardyń Brıýsselde ótken matchy belgııalyqtardyń paıdasyna 3:0 esebimen aıaqtalǵan bolatyn.

Sondaı-aq bul kúni The Ritz Carlton qonaqúıinde Krasnoıarsk qalasynan neoklassıkalyq kompozıtor Ilıa Beshevlıdiń jeke kontserti ótedi. Pıanıst buǵan deıin Reseıdiń qalalarynda óner kórsetken bolatyn. Mýzykalyq kesh 13 qazanda saǵat 16:00-de bastalady. Bılet baǵasy – 5400 teńge.