Qazaqstan baılanys spýtnıkterin eksporttaýy múmkin be – mınıstr jaýaby

ALMATY. KAZINFORM – Bul suraqqa AlmatyFair.ai kórmesinde Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev jaýap berdi. 

Vedomstvo basshysynyń aıtýynsha, Qazaqstan Mońǵolııa jáne Kongo memleketterimen jerdi qashyqtyqtan zondtaý (JQZ) spýtnıkterin jetkizý týraly ýaǵdalastyqqa qol jetkizgen. Bul elder qazaqstandyq tehnologııalardy aýyl sharýashylyǵy, ekologııa jáne tabıǵı resýrstardyń monıtorıngi sııaqty negizgi salalarda paıdalanýdy josparlap otyr.

Sondaı-aq bul memleketterdiń ınjenerleri spýtnıkter óndirisine qatysyp, tehnıkalyq qujattamany alady jáne ázirlengen aqparattyq júıelerge qol jetkizedi.

Jaslan Mádıev Qazaqstan baılanys spýtnıkterin qanshalyqty eksporttaýy múmkin ekenin de aıtty.

— Jerdi qashyqtyqtan zondtaý spýtnıkteri arqyly biz qazirdiń ózinde álemdik naryqqa shyǵyp otyrmyz, al baılanys spýtnıkteri boıynsha — ázirge mundaı jospar joq, - dedi ol.

Mınıstr Qazaqstanda óziniń KazSat baılanys spýtnıgi jumys istep turǵanyn, al qazir kelesi spýtnık — KazSat-3-ti óndirý nemese tapsyrys berý úshin tehnıkalyq qujattamany daıyndaý júrgizilip jatqanyn atap ótti.

Eske salaıyq, byltyr kúzde Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev spýtnıkterdi eksporttaýǵa qatysty eki elmen kelissóz júrgizip jatqanyn aıtqan edi. 

Qazaqstan spýtnıgin ımporttaýǵa qyzyǵýshylyq tanytqan elderdiń qataryn Gvıneıa-Bısaý tolyqtyrýy múmkin.