Qazaqstan baýyrlas halyqtardyń yntymaqtastyǵyn arttyrýdy kózdeıdi
ASTANA. KAZINFORM – Senat Tóraǵasy Máýlen Áshimbaev Túrkııa Respýblıkasynyń Qazaqstandaǵy Tótenshe jáne Ókiletti Elshisi Mustafa Kapýdjýmen kezdesti. Suhbat barysynda taraptar eki el arasyndaǵy yntymaqtastyqty odan ári nyǵaıtý jáne strategııalyq seriktestikti keńeıtý máselelerin talqylady. Bul týraly QR Parlamenti Senatynyń baspasóz qyzmeti málim etti.
Óz sózinde Máýlen Áshimbaev Mustafa Qapýdjýny byltyr Túrkııa Respýblıkasynyń qurylǵanyna 100 jyl tolýymen quttyqtady. Ol Qazaqstannyń Túrkııamen yntymaqtastyǵy tereńnen tamyr tartatynyn, eki eldiń mádenı-tarıhı qundylyqtary ortaq ekenin aıtty. Sondaı-aq Palata Spıkeri Túrkııamen qarym-qatynas elimizdiń syrtqy saıasatynyń mańyzdy baǵyttarynyń biri ekenin, ózara jan-jaqty strategııalyq seriktestikke memleket basshylarynyń dostyq pen qurmetke negizdelgen baılanysy úlken serpin beretin tilge tıek etti.
«Biz Túrkııanyń Uly Ulttyq Jınalysymen yntymaqtastyqty damytýǵa jáne zańnamalyq baǵytta tájirıbe almasýǵa múddelimiz. Eki eldiń Parlamentterinde jumys isteıtin «Qazaqstan-Túrkııa» parlamentaralyq dostyq toptarynyń áleýetin odan ári damytýdyń mańyzy zor. Túrkitildes elderdiń mádenı, ekonomıkalyq jáne gýmanıtarlyq saladaǵy baılanysyn nyǵaıtýǵa Túrki memleketteriniń Parlamenttik Assambleıasy da úlken úles qosyp otyr. Senat depýtattary TúrkPA komıssııalarynyń jumysyna jáne onyń sheńberinde ótetin basqa da is-sharalarǵa belsendi qatysyp keledi», – dedi Máýlen Áshimbaev.
Kezdesý kezinde Astanada ótken Túrki memleketteri uıymynyń 10-shy sammıtinde aıtylǵan baýyrlas halyqtardyń yntymaqtastyǵyn arttyrýdy kózdeıtin basymdyqtar týraly da sóz boldy.
«Túrki memleketteri uıymynyń 10-shy sammıtinde Qazaqstan Prezıdenti Qasym-Jomart Kemeluly Toqaev atap ótkendeı, bizdiń eldiń Uıymǵa tóraǵalyǵy «TURKTIME!» uranymen ótedi. Bul tujyrymdamada birinshi kezektegi basymdyqtar belgilengen. Ózara senim men tarıhı tamyrǵa taban tiregen birligimizdi saqtaý jáne nyǵaıtý – bizdiń ortaq maqsatymyz. Astana sammıti elderimiz arasyndaǵy saıası, ekonomıkalyq jáne mádenı yqpaldastyqty jańa deńgeıge kóterýge septigin tıgizdi dep esepteımiz», – degen Máýlen Áshimbaev Qazaqstan Parlamentiniń Senaty eki eldiń qarym-qatynasyn odan ári nyǵaıtý jolyndaǵy tıisti jumysty jalǵastyra beretinin atap ótti.
Sonymen qatar Senat Tóraǵasy Memleket basshysynyń bastamasymen Qazaqstanda iske asyrylyp jatqan áleýmettik-saıası jáne ekonomıkalyq reformalar barysyna jáne Palatanyń zań shyǵarý qyzmetine toqtaldy.
Óz kezeginde Mustafa Kapýdjý Qazaqstanda júrgizilip jatqan reformalardy joǵary baǵalap, túrki halyqtary arasyndaǵy ózara is-qımyldy odan ári arttyrýdyń mańyzdy ekenine nazar aýdardy.
