Qazaqstan Batystyń Reseıge qatysty qatań sanktsııalaryna oraı keshendi sharalardy ázirledi
ASTANA. QazAqparat - Batys Reseıge qatysty qatań sanktsııalar salǵan jaǵdaıda Qazaqstan bıligi óziniń keshendi sharalaryn iske qosady. Bul týraly búgin Ortalyq kommýnıkatsııalar qyzmetindegi brıfıngte QR Ulttyq bankiniń tóraǵasy Qaırat Kelimbetov málim etti.
«Reseı Qarjy mınıstrliginiń sońǵy esepteýlerinde ekonomıkanyń nóldik ósimi aıtyldy. Meniń oıymsha, taraptar barlyq saıası máselelerdi retteıtin bolady. Alaıda osyndaı táýekeldiń bolýy múmkindigin eskerip, biz Úkimetpen birlese otyryp, keshendi sharalardy daıarladyq. Osy oraıda Úkimet men Ulttyq bankte «B» jospary ázirlendi», - dedi UB basshysy.
Onyń sózine qaraǵanda, Qazaqstanda teńge baǵamyna júrgizilgen túzetýler reseılik rýbldiń aýytqýlaryn eńserýge múmkindik beredi.
«Bul másele uzaq merzimdi mejege sozylmaıdy dep úmittenemin. Qysqa merzimdi jaǵdaı boıynsha ózimiz úshin turaqty ári ońtaıly ahýaldy baıqap otyrmyz», - dedi ol.
