Qazaqstan bastamasymen BUU jańa ekologııalyq kúndi bekitti
ASTANA. KAZINFORM — Birikken Ulttar Uıymynyń Bas Assambleıasy Qazaqstan Respýblıkasynyń bastamasymen ázirlengen «Halyqaralyq planetany kógaldandyrý kúni» qararyn qabyldap, 22 sáýirdi Halyqaralyq planetany kógaldandyrý kúni dep jarııalady.
Halyqaralyq kúndi belgileý týraly bastamany Qazaqstan Respýblıkasynyń Prezıdenti Qasym-Jomart Toqaev 2025 jylǵy qyrkúıekte BUU Bas Assambleıasynyń 80-sessııasynyń jalpy pikirtalastary barysynda usynǵan bolatyn.
Qararǵa álemniń túrli óńirlerin bildiretin 32 memleket teń avtor boldy. Bul atalǵan bastamanyń halyqaralyq qoǵamdastyq úshin suranysqa ıe ári ózekti ekenin kórsetedi.
Qarardyń qabyldanýy Qazaqstannyń jahandyq ekologııalyq kún tártibin ilgeriletýge jáne qorshaǵan ortany qorǵaý, ekojúıelerdi qalpyna keltirý, jasyl jelekter aýmaǵyn keńeıtý jáne ekologııalyq mádenıetti qalyptastyrý baǵytyndaǵy halyqaralyq kúsh-jigerdi biriktirýge qosyp kele jatqan dáıekti úlesin kórsetedi.
Qujat álemdik qoǵamdastyqtyń kógaldandyrý men tabıǵı ekojúıelerdi qalpyna keltirýdiń mańyzdylyǵy týraly habardarlyǵyn arttyrýǵa, sondaı-aq memleketterdi, BUU júıesin, halyqaralyq jáne óńirlik uıymdardy, azamattyq qoǵamdy jáne basqa da múddeli taraptardy tıisti is-sharalar men bastamalardy júzege asyrýǵa yntalandyrýǵa baǵyttalǵan.
Halyqaralyq kúnniń belgilenýi Qazaqstanda júzege asyrylyp jatqan qorshaǵan ortaǵa jaýapkershilikpen qaraýdy qalyptastyrýǵa, aýmaqtardy abattandyrýǵa jáne qoǵamnyń ekologııalyq mádenıetin arttyrýǵa baǵyttalǵan «Taza Qazaqstan» jalpyulttyq ekologııalyq aktsııasynyń maqsattarymen úndesedi.
Qarardyń qabyldanýy Memleket basshysynyń taǵy bir halyqaralyq bastamasynyń is júzinde júzege asyrylýy boldy jáne Qazaqstannyń ornyqty damý men bolashaq urpaq úshin qorshaǵan ortany saqtaýǵa baǵyttalǵan kópjaqty yntymaqtastyqty nyǵaıtý jónindegi tásilderiniń suranysqa ıe ekenin rastaıdy.
Aıta ketelik Prezıdenttiń jalpyulttyq bastamasy ekologııaǵa degen kózqarasty qalaı ózgertkeni týraly jazǵan edik.
