Qazaqstan bastamashy bolǵan zań úlgisi TMD Parlamentaralyq Assambleıasynda maquldandy
ASTANA.KAZINFORM - Senat tóraǵasy Máýlen Áshimbaev bastaǵan qazaqstandyq parlamentshiler búgin Tájikstan astanasynda ótip jatqan TMD Parlamentaralyq Assambleıasynyń otyrystaryna qatysty, dep habarlaıdy Kazinform agenttiginiń menshikti tilshisi.
TMD Parlamentaralyq Assambleıasy aıasynda Qazaqstan bastamashy bolǵan «Turmystyq zorlyq-zombylyqqa qarsy kúres týraly» zań úlgisi maquldandy. Ony buryn elimiz Qazaqstandaǵy zań shyǵarýshylyqtyń oń tájirıbesin eskere otyryp usynǵan bolatyn. Zań áıelder men balalardyń quqyqtaryn qorǵaýdy kúsheıtýdegi betburys boldy.
QR Parlamenti Májilisiniń depýtaty Aıgúl Quspan TMD Parlamentaralyq Assambleıasynda Halyqaralyq Qyzyl Krest jáne Qyzyl Jarty aı qoǵamdary federatsııasyna baqylaýshy mártebesin berý týraly aıtty.
Depýtat Olga Býlavkına kezdesýge qatysýshylardy jerdi basqarý, parnıktik gazdar shyǵaryndylaryn shekteý jáne TMD-ǵa múshe memleketterdiń jer qoınaýyn paıdalaný týraly úlgi kodeksine túzetýler engizý týraly zań úlgilerimen tanystyrdy, olar ulttyq zańnamaǵa engizý úshin TMD PAA múshe memleketterdiń parlamentterine usynyldy.
TMD Parlamentaralyq Assambleıasynyń kúzgi kóshpeli sessııasynyń is-sharalary Tájikstan astanasynda ótip jatyr. Tájikstan 2025 jyly Táýelsiz Memleketter Dostastyǵyna tóraǵalyq etedi.
Osyǵan deıin Qazaqstan parlamentarııleri Dýshanbede TMD PAA-nyń plenarlyq otyrysyna qatysqany týraly jazdyq.