Qazaqstan basshysynyń Bishkekke saparynan kúterimiz kóp – Qyrǵyzstan Prezıdentiniń keńesshisi
«Qazaq-qyrǵyz zııalylarynyń forýmy osymen tórtinshi ret uıymdastyrylyp otyr. Bul jıyn eki eldiń ortasyndaǵy erekshe rýhanı kópirge aınaldy. Osy forýmdy ótkizýde Halyqaralyq Túrki akademııasynyń róli aıryqsha. Eki el arasyndaǵy baýyrlastyqqa, taǵyz qarym-qatynasqa baılanysty zııaly qaýym ókilderi jaqsy pikirlerin aıtyp jatyr. Bizdiń elder bir-birine erekshe jaqyn, bir týǵan ári bir tamyr elmiz. Sondyqtan qyrǵyzdar úshin qazaqtar óte jaqyn, biz júregimizde Qazaqstanǵa janashyrlyqpen qaraımyz», - dedi S. Raev.
Osy oraıda ol Qazaqstan men Qyrǵyzstan arasyndaǵy túrli salalardaǵy baılanystardy tereńdete túsý kerektigin atap ótti.
«27 qarashada ótetin Qazaqstan Prezıdenti Qasym-Jomart Toqaevtyń Qyrǵyzstanǵa memlekettik sapary aıasyndaǵy mańyzdy taqyryptar talqylanady dep kútip otyrmyz. Ekonomıkalyq, mádenı, saıası jáne gýmanıtarlyq máseleler boıynsha da strategııalyq qujattarǵa mán beriledi dep oılaımyz. Osy oraıda bul sapardyń nátıjesi aıasynda aýqymdy jetistikterge qol jetkiziledi degen pikirdemiz», - Qyrǵyz Respýblıkasy Prezıdentiniń keńesshisi.
Budan buryn habarlanǵandaı, 27 qarashada Qazaqstan Prezıdenti Qasym-Jomart Toqaev Qyrǵyzstan Prezıdenti Sooronbaı Jeenbekovtiń shaqyrýymen Qyrǵyzstanǵa memlekettik saparmen barady.
Kelissózder barysynda eki el basshylary Qazaqstan men Qyrǵyzstan arasyndaǵy strategııalyq seriktestiktiń qazirgi ahýaly men perspektıvalaryn talqylaıdy jáne kezdesý qorytyndysy boıynsha birqatar ekijaqty qujatqa qol qoıylady dep josparlanýda.
Aıta ketý kerek, qazaq-qyrǵyz zııalylarynyń alǵashqy basqosýy Túrki akademııasynyń bastamasymen 2018 jyldyń sáýir aıynda Nur-Sultan qalasynda ótken bolatyn. Budan keıin týysqan eki eldiń yntymaqtastyǵyna aıryqsha yqpal etken ıgi shara sol jylǵy qazan aıynda Osh qalasynda jalǵasyn tapty.
Sonymen qatar, Uly dalanyń máńgilik mırasy «Manas» dastany men kórnekti ǵalym Shoqan Ýálıhanov taǵylymyna arnalǵan úshinshi forým bıylǵy maýsym aıynda Jetisý jerinde, Taldyqorǵan qalasynda uıymdastyryldy.
