Qazaqstan basketbol quramasynyń 29 jastaǵy bas bapkeri qyzmetinen ketti
NUR-SULTAN. QazAqparat – «Astana» basketbol klýbynyń jáne Qazaqstan ulttyq quramasynyń bas bapkeri Renatas Kýrılıonokas qyzmetinen ketti, dep habarlaıdy QazAqparat tilshisi.
Bul týraly 29 jastaǵy lıtvalyq maman Instagram-daǵy paraqshasynda jarııa etti.
«Qadirli dostar, mansabymnyń «Astanadaǵy» jáne Qazaqstandaǵy kezeńi aıaqtaldy. Birge jumys isteý múmkindigin bergenderińizge kóp alǵys!.. Baǵa jetpes tájirıbe jınaqtadym», - dep jazdy ol.
Budan ári jas bapker jańa jobany qolǵa alǵaly otyrǵanyn da aıtty.
«Men jańa baǵytqa bet burdym. Polshada LEGIA klýbymen kelisimshartqa qol qoıdym. Sizderdiń nátıjelerińizdi qaraı júremin. «Astana» - ómirimniń mańyzdy bóligi», - dedi Kýrılıonokas.
Aıta keteıik, Renatas Kýrılıonokas 2016 jyldyń tamyz aıynda «Astana» BK bapkerler shtabyna kelip qosyldy, al ulttyq quramaǵa byltyr shilde aıynda bas bapker etip taǵaıyndalǵan.
