Qazaqstan básekelestik saladaǵy zańnamasyn jetildirý úshin ne isteýi kerek – EYDU usynymdary
ASTANA. KAZINFORM – Almatyda elimizdiń básekelestik salasyndaǵy zańnamasy men saıasatyna arnalǵan ekinshi eksperttik sholýdy tanystyrý rásimi ótti.
- Sholý - aǵymdaǵy jáne bolashaqtaǵy reformalarymyz úshin mańyzdy baǵdar. Birinshi sholýdan beri Qazaqstan halyqaralyq standarttarǵa saı zańnamany jetildirýge baǵyttalǵan reformalarǵa berik ustanym kórsetip otyr, – dedi kezdesýdi ashqan Básekelestikti qorǵaý jáne damytý agenttiginiń tóraǵasy Marat Omarov.
2025 jyldyń maýsym aıynda Parıjde sholý jobasy EYDU Básekelestik komıtetiniń tóraǵasy tarapynan bekitilgen. Eksperttik sholý — bul eldiń básekelestik zańnamasy men saıasatyn taldaýdyń ekinshi kezeńi. Birinshi sholý 2016 jyly EYDU tarapynan júrgizilgen bolatyn. Sholý sońǵy 10 jyldaǵy júrgizilgen reformalardy qamtıdy.
Sonymen EYDU Qazaqstannyń básekelestik saıasatyn jetildirý jáne quqyq qoldanýdy kúsheıtý boıynsha mynadaı usynymdar berip otyr:
- monopolııaǵa qarsy quqyq boıynsha mamandandyrylǵan apellıatsııalyq sottar qurý múmkindigin zerdeleý, sýdıalar úshin básekelestik máseleleri boıynsha arnaıy daıarlyq pen biliktilikti arttyrý kýrstaryn uıymdastyrý, apellıatsııalyq sottarda shaǵymdardy qaraýǵa jetkilikti protsessýaldyq merzimder belgileý;
- básekelestik týraly zańnamany buzǵany úshin qoldanylatyn aıyppuldardy AEK negizinde esepteý ádistemesinen bas tartyp, olardyń mólsherin buzýshynyń aınalymynan esepteletin paıyz túrinde belgileý;
- básekelestik týraly zańnamadaǵy «jumsaq quqyq» quraldaryn quqyq qoldaný praktıkasyna engizýdiń áserin muqııat baǵalaý;
- básekelestikke qaýip tóndirmeıtin mámileler úshin ońaılatylǵan rásimder men habarlama nysandaryn saqtaý;
- biryńǵaı operatorlar men tabıǵı monopolııalardy qurýdy shekteý;
- monopolııaǵa qarsy organnyń qyzmetiniń ashyqtyǵyn kúsheıtý, agenttiktiń (Básekelestikti qorǵaý jáne damytý agenttigi) barlyq sheshimin tolyq kólemde jarııalaýdy, qupııa jáne kommertsııalyq turǵydan sezimtal aqparattyń tıisti deńgeıde qorǵalýyn qamtamasyz etý;
- monopolııaǵa qarsy baqylaýdyń jedeldigin jáne tıimdiligin arttyrý maqsatynda qoldanystaǵy tergeýdi bastaý týraly habarlandyrý júıesin shekteý nemese tolyq joıý múmkindigin qarastyrý.
Taıaýda Qazaqstan EYDU alańynda sybaılas jemqorlyqqa qarsy reforma nátıjelerin tanystyrǵan edi.