Qazaqstan bas bostandyǵynan aıyrylǵandardyń úles sany boıynsha álemdik reıtıngte 55-orynǵa tústi - A. Raxmetýllın
ASTANA. QazAqparat - Qazaqstan sottalǵandardyń ishinde bas bostandyǵynan aıyrylǵan azamattardyń kólemi boıynsha álemdik reıtıngte 55-orynǵa tústi. Bul týraly búgin Ortalyq kommýnıkatsııalar qyzmetinde ótken brıfıngte QR Joǵary Sotynyń Qylmystyq ister boıynsha sot alqasynyń tóraǵasy Abaı Raxmetýllın málim etti.
«2014 jylmen salystyrǵanda, 2015 jyly sotqa 10,4%-ǵa is kóp tústi jáne qaraldy. Jańa zańnamalyq baza sot qorǵaý salasyn keńeıtýge múmkindik berdi. 2014 jylmen salystyrǵanda, 2015 jyly aqtalǵandardyń sany 55%-ǵa artqan. Eger byltyr aqtalǵandar sany 478 bolsa, 2015 jyly - 743 boldy», - dep atap ótti ol.
Onyń sózine qaraǵanda, byltyr merziminen buryn shartty túrde bosatylǵandar sany 9 myń adamdy quraǵan. Sonymen qatar 5520 adamǵa jaýapkershilik aýyr jazadan jeńiline aýystyryldy.
«2015 jyly sotpen bas bostandyǵynan aıyrylǵandardyń úlesi 25,5%-dy qurady. Bul 2014 jylmen salystyrǵanda 13%-ǵa kem. Osynyń nátıjesinde Qazaqstan sottalǵandardyń sany boıynsha álemdik retıngte 55-orynǵa syrǵydy. 100 myń adamǵa bizde 233 sottalǵannan keledi», - dedi A. Raxmetýllın.
