«Qazaqstan barysynyń» bıylǵy jeńimpazy 25 mln teńge alady
«QR Ulttyq olımpıada komıteti jalpy ulttyq sportty qoldaıdy. Sonyń ishinde Qazaq kúresine erekshe kóńil bólemiz. «Qazaqstan barysy» jobasyn da qoldaımyz. Jaqynda Ulttyq olımpıada komıtetiniń tóraǵasy Tımýr Qulybaev Lozannada Halyqaralyq kúres federatsııasynyń basshysymen kezdesip, Halyqaralyq Qazaq kúresi federatsııasyn múshelikkke engizý máselesin qozǵap, sol jaqtan qoldaý tapty. Meniń oıymsha, bul óte kerek nárse. Bolashaqta da bizdiń UOK «Qazaqstan barysy» týrnırine qoldaý kórsete beredi», - dedi Ulttyq olımpıada komıtetiniń sport dırektsııasynyń dırektory Elsııar Qanaǵatov OKQ-da ótken baspasóz máslıhatynda.
Týrnırdi ótkizýge birshama bıznesmen-metsenattar qoldaý bildirip otyr. Sonyń biri - «Orda ınvest» korporatsııasynyń basqarma tóraǵasy Shalqarbek Talıpov árúrli federatsııalarmen birge Qazaq kúresi federatsııasyna da aldaǵy ýaqytta qoldaý kórsetiletinin atap ótti.
QR Qazaq kúresi federatsııasynyń prezıdenti Arman Shoraevtyń aıtýynsha, osymen toǵyzynshy ret ótetin básekege elimizdiń 14 oblysynan, Nur-Sultan, Almaty, Shymkent qalalarynan jáne kúshtik qurylymdar arasyndaǵy týrnırde irikteýden ótken 36 úzdik balýan qatysady. Resmı salmaq ólsheý rásimi 6 maýsym, saǵat 19.00-ge belgilengen.
«Qazaqstan barysy» týrnıri 8 maýsymda 13:00-de balýandardyń jerebe tartý rásiminen bastalmaq. Tartysty beldesýler jeti saǵatqa sozylady dep josparlanǵan. Shara aıasynda sporttyq saıystarmen qatar kontserttik baǵdarlama men keremet shoý ótedi. «Qazaqstan barysy» týrnıriniń bıylǵy júlde qory qomaqty - 40 mln teńge», - deıdi ol.
Jeńimpaz atanǵan balýanǵa altyn belbeý men altynnan quıylǵan aýyspaly «Taıtuıaq», 25 mln teńge syıaqy tabystalady. Ekinshi jáne úshinshi oryn ıegerleri sáıkesinshe kúmis jáne qola belbeýlermen marapattalady. Sonymen qatar, ár beldesýdegi jeńiske 100 myń teńgeden beriledi. Sondaı-aq, jyldaǵy dástúrge saı jankúıerler arasynda avtokólik oınatylady.
«Kelesi jyldan bastap bir oblystan bir ǵana balýan qatysatyn bolady. Ony upaı, reıtıng arqyly anyqtaımyz. Keı oblystarda qazaq kúresi jaqsy damyǵan. Keıbir oblystardyń deńgeıi onsha emes degendeı. Bıyl Qostanaı oblysynda «Qazaqstan barysyna» balýandardy irikteý ótti. Óte shalaǵaı... Jarys óte tómen deńgeıde uıymdastyrylǵan. Sol oblystyń ákiminiń qulaǵyna altyn syrǵa. Al Qyzylorda, Túrkistan, Almaty, Shyǵys Qazaqstan oblystarynda «sen tur, men ataıyn» degen balýandar kóp. Reıtıng boıynsha olarǵa jarysqa qatysýǵa múmkindik beremiz dep oılaımyn. Al reıtıngte joǵary upaı jınaý úshin kúntizbemizdegi saıystarǵa qatysý kerek. Sonymen qatar, biz qazaq kúresiniń sapasyn kóteremiz degen oıdamyn», - dep túıindedi sózin Arman Shoraev.
Týrnırge bıletter qazirden bastap «Meloman» dúkenderi jelisi men ticketon.kz, zakazbiletov.kz, kassir.kz saıttarynda (500 teńge men 5000 teńge aralyǵynda) satylyp jatyr.
