«Qazaqstan barysynda» ShQO namysyn Aıbek Nuǵymarov qorǵaıdy
ASTANA. QazAqparat - Semeıde qazaq kúresinen elimizdiń Tuńǵysh Prezıdenti N.Á.Nazarbaevtyń júldesi úshin ótetin respýblıkalyq «Qazaqstan barysy» týrnırine irikteý retinde oblystyq saıys ótti, dep habarlaıdy QazAqparat tilshisi ShQO dene shynyqtyrý jáne sport basqarmasyna silteme jasap.
«Tarlan» sport kesheninde óńirdiń eń úzdik 22 balýany bas qosyp, ózara kúsh synasqan. Qatysýshylar absolıýtti salmaqta ózara myqtyny anyqtady. Balýandar arasynda sheberligi shyńdalǵan sportshylardan bólek, tájirıbesi tolyspaǵan qatysýshylar da boldy. Alyptar básekesine elimiz boıynsha mańdaı aldy sportshylardyń biri, «Qazaqstan barysy - 2013» týrnırinde top jaryp, qazaq kúresinen absolıýtti Álem chempıony, «Álem barysy - 2017» dodasynyń jeńimpazy atanǵan Aıbek Nuǵymarov ta qatysyp, babynda ekendigin baıqatty. Barlyǵy bes beldesý ótkizip, ár kezdesýin aıqyn basymdyqpen aıaqtady.
«Jarys joǵary deńgeıde ótti. Barlyǵy jaqsy daıyndyqpen kelipti. Aıta ketý kerek, sońǵy ýaqytta qazaq kúresi oblysymyzda birqalypty damyp keledi. Sebebi, munda jarys jolyna shyqqan árbir jas qatysýshynyń ózi óte tartysty beldesýler ótkizip, sheberlikterimen tań qaldyrdy», - dedi Aıbek Nuǵymarov.
Týrnır irikteý saıysy esebinde ótkizildi. Aqtyq synda óner kórsetken balýandar dástúrli jarysqa aınalǵan «Qazaqstan barysy» dodasynda aımaq namysyn qorǵamaq. «Shyǵys Barysy» týrnıriniń ótýi osymen jetinshi márte. Asa tartysty ótken saıys qorytyndysynda jeńimpazdar men júldegerler tómendegideı anyqtaldy:
1 oryn - Aıbek Nuǵymarov (Semeı)
2 oryn - Maqsat Mázibaev (Tarbaǵataı aýdany)
3 oryn - Erlan Konkıev (Abaı aýdany).
