«Qazaqstan barysynda» Qaraǵandy oblysynyń namysyn qorǵaıtyn palýandar anyqtaldy

QARAǴANDY. QazAqparat – Qaraǵandy oblysynyń 22 myqty palýany «Saryarqa Barysy» úzdik ataǵy úshin ózara baq synasty, dep habarlaıdy QazAqparat.

«Bul «Qazaqstan Barysy» respýblıkalyq týrnırine irikteý jarysy. Qazaq kúresi memleket tarapynan úlken qoldaý kórip otyr. Jyl saıyn qatysýshylar sany artyp keledi. Tek bizdiń óńirde jastar arasyndaǵy jarysqa 300-den astam sportshy qatysady. Bul qazaq kúresiniń damyp kele jatqanyn kórsetedi», – dep atap ótti týrnırdi uıymdastyrǵan «Jas suńqar» sport mektebiniń basshysy Almas Muhtarov.

Barlyq qatysýshylar arasynda jekpe-jekter qyzý ótti.

«Barlyq palýandar jaqsy daıyndalǵan. Mundaı jarystarǵa alǵash ret qatysqandar da boldy. Jastardyń ulttyq sport túrlerine qyzyǵýshylyq tanytyp, aınalysyp jatqany qýantady», - deıdi qazaq kúresi boıynsha joǵary deńgeıdegi tóreshi, týrnırdiń bas tóreshisi Abaı Úmitbaev.

Nátıjesinde Shet aýdanynan Aqjigit Oralov «Saryarqa barysy» atandy. Ekinshi oryndy temirtaýlyq Aqjol Dúısenbaev ıelendi. Úshinshi oryn Abaı aýdanynan Aıdar Ońaıbekovke buıyrdy.

«Qazaq kúresimen 7 jyldan beri aınalysamyn, onyń ishinde dzıýdomen de. Toparda jattyǵamyn. «Saryarqa barysyna» alǵash ret qatystym. Barlyq qarsylastardy zerttedim. Oblystaǵy eń myqty sportshylar – Qarqaraly jáne Shet aýdandarynan kelgen sportshylar», - deıdi jas sportshy Aıdar Ońaıbekov.

Birinshi jáne ekinshi oryn alǵan palýandar 30 maýsymda Astanada ótetin «Qazaqstan Barysy» sýpertýrnırinde Qaraǵandy oblysy atynan óner kórsetedi.