Qazaqstan Barysyna Batys Qazaqstannan eki balýan barady

ORAL. QazAqparat – Qazaq kúresinen dástúrli «Qazaqstan Barysy» respýblıkalyq týrnırine Batys Qazaqstan oblysynan eki balýan barady, dep habarlaıdy QazAqparat tilshisi.

Aqsaı qalasynda atalmysh týrnırdiń oblystyq irikteý kezeńi márege jetti.

BQO dene shynyqtyrý jáne sport basqarmasy, BQO qazaq kúresi assotsıatsııasy jáne Bórli aýdany ákimdigi uıymdastyrǵan dodaǵa barlyǵy 14 balýan qatysyp, baq synady.

Bórli aýdanynyń ákimi Erkebulan Ihsanov pen BQO dene shynyqtyrý jáne sport basqarmasynyń basshysy Qaımen Esendııarov sportshylarǵa sáttilik tiledi.

Tartysty ótken beldesýlerden keıin fınalǵa bórlilik Temirlan Kólbaı men Syrym aýdanynyń ókili Mereı Berdiǵalı shyqty. Sońǵy synda Temirlan qarsylasynan basym túsip, «Jaıyq Barysy» atandy. Úshinshi oryn jańaqalalyq Erasyl Ahmetovke buıyrdy.

Jeńimpaz-júldegerler arnaıy belbeý, dıplom, medal jáne aqshalaı syılyqtarmen marapattaldy.

Osylaısha, bıyl «Qazaqstan Barysynda» T.Kólbaımen birge M.Berdiǵalı alǵash ret oblys namysyn qorǵaıdy.

«Shákirtim Temirlan Kólbaı osymen tórtinshi ret «Qazaqstan Barysyna» barǵaly otyr. Temirlan – sonymen qatar sambo men dzıýdodan olja salyp júrgen balýan. Sambodan eki dúrkin Azııa chempıony, dzıýdodan Azııa birinshiliginiń jeńimpazy. Bıyl sambo men dzıýdodan Qazaqstan chempıonatyn utty. Endi «Qazaqstan Barysynda» da barymyzdy salatyn bolamyz», dedi QazAqparat tilshisine Temirlan Kólbaıdyń bapkeri Qasym Qajenov.