«Qazaqstan barysy» jarysynda beldesetin eń aýyr balýan kim?

ASTANA. QazAQparat - Qazaqstan Respýblıkasy Tuńǵysh Prezıdentiniń júldesi úshin qazaq kúresinen «Qazaqstan Barysy» VII Respýblıkalyq týrnırine qatysatyn eń aýyr salmaqtaǵy balýannyń esimi belgili boldy, dep habarlaıdy QazAqparat tilshisi. 

EKSPO janyndaǵy «Mega Silk Way» oıyn-saýyq ortalyǵynda ótken saltanatty salmaq ólsheý rásiminde aqtaýlyq Kenjebek Kúzembaevtyń salmaǵy eń aýyr bolyp shyqty. Ol - 145,800 keli boldy. Ekinshi satyda Elaman Erǵalıev. Onyń tarazydaǵy kórsetkishi - 141,600 keli. Al, 2013 jylǵy «Qazaqstan barysy» atanǵan shyǵysqazaqstandyq balýan Aıbek Nuǵymarov aýyr balýandardyń «úzdik» úshtigin túıindedi. Onyń salmaǵy - 136,500 keli.

Aıta keteıik, «Qazaqstan Barysy» fınalyna elimizdiń 14 oblysy, Almaty men Astana qalalary jáne áskerıler arasynda irikteýden úzdik shyqqandar qatysady. «Qazaqstan Barysy» týrnıriniń fınaly 2 shilde kúni saǵat 12:00-de Astana qalasyndaǵy «Barys Arena» muz saraıynda ótkiziledi. Qazaqstan aýmaǵynda «Qazaqstan Barysy» týrnıriniń resmı bas habar taratýshysy «Qazaqstan» jáne «Qazsport» telearnasynan tikeleı efırde kórsetedi.