«Qazaqstan Barysy» V respýblıkalyq týrnıriniń júlde qory 225 000 AQSh dollaryn quraıdy
ASTANA. QazAqparat - Ult kóshbasshysy Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» V respýblıkalyq týrnıriniń fınaldyq kezeńi 4 shilde Astanadaǵy «Saryarqa» respýblıkalyq velotreginde ótedi.
Bıyl besinshi ret uıymdastyrylatyn «Qazaqstan Barysy» týrnırine elimizdiń ár aımaǵynan iriktelgen 32 balýan men byltyrǵy jylǵy jarystyń jeńimpazy Muhıt Tursynov joldama alyp otyr. Tursynov týrnır erejesine saı bıylǵy básekege irikteýsiz shyqty. Іrikteý jarysy naýryz aıynan bastap, mamyr aıyna deıin úsh kezeń (aýyl, aýdan, oblys) boıynsha júrgizildi.
«Qazaqstan Barysy» V respýblıkalyq týrnıriniń júlde qory 225 000 AQSh dollaryn quraıdy. Onyń ishinde 35 myń AQSh dollary sportshylardyń jattyqtyrýshylaryna taǵaıyndalǵan. Júlde qory tómendegideı:
1-oryn - 150 myń AQSh dollary; 2-oryn - 30 myń AQSh dollary; 3-oryn - 10 myń AQSh dollary.
Dodanyń bas demeýshisi «Samuryq-Qazyna» Ulttyq ál-aýqat qory» AQ bolyp tabylady.
Aıta keteıik, bıylǵy «Qazaqstan Barysyna» qatysatyn 33 balýannyń 16-sy buǵan deıingi saıystarda óner kórsetti. Onyń ishinde týrnırge úzbeı qatysyp kele jatqan úsh balýan bar. Olar - 2012 jylǵy «Qazaqstan Barysy» atanǵan Beıbit Ystybaev (Jambyl oblysy), 2013 jylǵy «Qazaqstan Barysy» Aıbek Nuǵmarov (ShQO) jáne Aqmola oblysynyń alyby Nurlan Jamalov. Osy úsh balýan 2011 jyldan beri uıymdastyrylyp kele jatqan týrnırden birde-bir ret qalǵan emes.
