«Qazaqstan barysy» úılendi
ASTANA. QazAqparat - "Qazaqstan Barysy - 2012" týrnıriniń jeńimpazy Beıbit Ystybaev shańyraq kóterdi, dep habarlady Vesti.kz.
B.Ystybaevtyń jubaıynyń esimi Áıgerim, eki jastyń shańyraq kóterý toıy sportshynyń týǵan qalasy Taraz shaharynda ótti. Qazaq kúresiniń damýyna zor úles qosyp júrgen sportshynyń toıyna sportshy dostarymen qatar Qazaqstan estradasynyń juldyzdary da qatysty.
Esterińizge sala keteıik, Beıbit Ystybaev 2012 jyly «Qazaqstan barysy» týrnırinde bas júldeni ıelengen edi. Ótken jylǵy týrnırde de talaı qarsylasynyń jaýyrynyn jer ıisketken ol jartylaı fınalda qaraǵandylyq Erjan Shynkeevpen beldesken bolatyn. Bul beldesýde qarsylasynan basym túskenimen Shynkeev daý shyǵaryp, tóreshiler oǵan sońǵy aınalymda beldesý múmkindigin bergen-di. Mundaı sheshimge narazylyq tanytqan B.Ystybaev úshinshi orynǵa talaspaı, jarys jolyna shyǵýdan bas tartty.
Týrnır ótkennen keıin úsh aıdan soń Ystybaevtyń bir jyl jarysqa qatysýyna shekteý qoıylyp, Qazaqsha kúres federatsııasy jarys erejesin qaıta qarady. Aıta keterligi, B.Ystybaev jazaǵa tartylǵanymen bıyl ótetin «Qazaqstan barysy» týrnırine qatysa alady.
