«Qazaqstan barysy» týrnıriniń jeńimpazy mıllıonerge aınalady
ASTANA. 18 qyrkúıek. QazAqparat - «Qazaqstan barysy» týrnıriniń kórermenderi arasynda avtokólik oınatylady.
Bul týraly búgin Astanada ótken baspasóz máslıhatynda «Qazaqstan barysy» qorynyń basshysy Arman Shoraev málim etti.
Onyń aıtýynsha, quny 4,5 mln. teńge bolatyn Hıýndaı Elantra avtokóligi tamashalaýǵa kelgen kórermenderdiń bıletteri arqyly oınatylmaq.
Eske sala keteıik, 2012 jyldyń 22 kyrkúıeginde Astanada 32 palýan «Qazaqstan barysy» ataǵyna talasady. Jarys 74 keliden joǵary salmaq dárejesinde ótedi. Týrnırdiń basty júldesi - QR Ulttyq banki quıǵan «Altyn taıtuıaq» kýbogi jáne Altyn belbeý. Oǵan qosa, jeńimpaz 24 mln. teńge men 6,5 mln. teńge turatyn Hıýndaı Sonata kóligin ıelenedi. Ekinshi, úshinshi oryn alǵandar kúmis pen qola medal jáne aqshalaı syıaqy alady.
Baspasóz máslıhatynda belgili bolǵanyndaı, uıymdastyrýshylar byltyrǵy kemshilikterdi qysqartqan. Bıyl qatysýshylardyń sany eki ese azaıtylǵan. Biraq sanyn azaıtqanmen, sapasyn kerisinshe kóterdik dep otyr.
«Aýdan jáne oblys deńgeıinde qyzý shaıqastar boldy. Sebebi ár oblystan burynǵydaı 4 emes, eki adamnan ǵana iriktep aldyq. Byltyr, jasyratyny joq, irikteý týry jáı qaǵaz túrinde ótti. Al bıyl fınalǵa bergisiz ádemi aıqastar boldy. Sondyqtan bıyl eń bilekti, myqty palýandar shyqty dep oılaımyn», - deıdi A. Shoraev.
«Qazaqstan barysy» qory jetekshisiniń aıtýynsha, eń basty maqsat - ulttyq kúresti eń aldymen óz elimizde nómiri birinshi sportqa aınaldyrý, ekinshiden, bul kúres túrin sheteldik týrıstterdi tartatyn brend deńgeıine deıin kóterý.
«Mysaly, Mońǵolııada túıe palýandar kúresine avstralııalyqtar, nemister, amerıkalyqtar kelip tamashalaýǵa daǵdy jasap alǵan. 3-4 jyldan keıin bizdiń de palýandarymyz Mońǵolııaǵa, Japonııaǵa baryp, sol jerde keremet degenderdiń barlyǵyn jambasqa salatyn deńgeıge jetedi», - dep atap ótti ol.
Ulttyq qazaq kúresinen ótetin týrnırdiń negizgi maqsaty - qazaq kúresin damytý jáne jastardy ulttyq salt-dástúrge dáripteý. Sonymen qatar, qazaq kúresin jazǵy Olımpıada men Azııa oıyndaryna qosý jospary bar.
Byltyr 20 tamyzda Qazaqstanda «Qazaqstan barysy» І respýblıkalyq týrnıri 64 palýannyń qatysýymen ótkeni belgili.
Onda júlde qory 250 myń AQSh dollaryn qurady. Altyn belbeý qyzylordalyq Ulan Rysqulǵa, kúmis belbeý jambyldyq Beıbit Ystybaevqa, qola belbeý shyǵysqazaqstandyq Shalqar Jolamanovqa buıyrdy.
Uıymdastyrýshylar: QR Sport jáne dene shynyqtyrý isteri agenttigi, QR Mádenıet jáne aqparat mınıstrligi, Qyzylorda oblysy ákimdigi, «Qazaqstan barysy» Qazaq kúresin damytý qoǵamdyq qory, Qazaq kúresi federatsııasy.
Týrnırdiń bas demeýshisi - «Samuryq-Qazyna» UÁQ. Týrnır týraly tolyǵyraq www.kazakhstanbarysy.kz saıtynan bilýge bolady.
