«Qazaqstan barysy» týrnıriniń jeńimpazy Aıbek Nuǵymarov jerlesterin Naýryz merekesimen quttyqtady
«Qurmetti qazaqstandyqtar! Barlyq jerlesterimdi qazaqtyń ulyq merekesi Naýryzben quttyqtaımyn!
Árbir qazaq balasy sııaqty bul merekeniń meniń de ómirimdegi orny erekshe. Óıtkeni qarshadaıymnan osy Naýryz toılarynda topqa túsip, qazaq kúresine shyńdaldym. Bolashaq balýan retinde áýeli aýylyma, odan keıin jalpaq jurtqa tanylýyma osy qasıetti meıram sebepker bolǵanyn esh umytqan emespin.
Memleketimiz táýelsiz el retinde osymen jıyrma tórtinshi Naýryzyn qarsy alýda. Osy aralyqta ekonomıkamyz órlep, ál-aýqatymyz artyp qana qoımaı, qazaqy qundylyqtarymyz laıyqty baǵasyn alyp jatyr. Joǵalǵanymyz qaıta jańǵyryp, óshkenimiz tirilýde. Sonyń aıqyn dáleli retinde qazaq kúresinen álem chempıonaty joǵary deńgeıde uıymdastyryla bastaǵanyn aıtar edim. Búginde qazaqtyń tól kúresin alty qurlyqtyń halqy biledi. Bir ǵana Shyǵys Qazaqstan oblysynda bizdiń jolymyzdy qýyp, qazaq kúresine ómirin arnaýǵa bekingen jeti myńnan astam jasóspirim bar. Munyń bári de memleketimizdiń tól kúresimizge degen tikeleı qamqorlyǵynyń arqasynda bolyp jatyr. Qazaq kúresinen bólek kókpar men aýdaryspaq, aıtys pen dástúrli mýzyka memleket qamqorlyǵyna alyndy. Osynyń bári meni qazaqtyń qarapaıym uly retinde qýantpaı qoımaıdy.
Naýryz - yrys pen yntymaqtyń, bereke men birliktiń, jaqsylyq pen jańarýdyń merekesi dep jatamyz. Qazaqı jyl sanaý boıynsha esigimizden engen qoı jyly yrysty bolsyn. Memleketimiz aldaǵy ýaqytqa josparlaǵan barlyq mejelerdi tabysty baǵyndyryp, qıyndyqtardy qapylyssyz eńserýine sebepker jyl bolsyn qoı jyly. Qoı jyly qazaq eli úshin asa mańyzdy oqıǵalarǵa toly kezeńge dóp kelip otyr. Demek, bul jyldan kúterimiz kóp.
Sonaý saq dáýirinen beri tarıhtyń talaı tosqaýylyn kórse de ozyq dástúr retinde búgingi kúnge jetken Áz Naýryzdyń qazaq úshin mańyzy men mártebesi árqashan erekshe. Bir shańyraq astynda, bir týdyń astyna toptasqan jurtymyzdyń tatýlyǵy nyǵaıyp, el irgesi bekı bersin. Barlyq qazaqstandyqtardyń otbasyna bereke, baılyq, baqyt tileımin. Ulttyq merekemiz, ulyq merekemiz barlyǵymyzǵa tek qana qýanysh ákelsin!» dep jazylǵan balaýannyń quttyqtaýynda.
