«Qazaqstan Barysy» týrnıriniń fınaly 5 shilde kúni ótpeıtin boldy
ASTANA. QazAqparat - Osymen besinshi márte uıymdastyrylǵaly otyrǵan Ult Kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» respýblıkalyq týrnıriniń sheshýshi dodasy 5 shilde kúni ótpeıtin boldy. Bul týraly «Qazaqstan Barysy» qazaq kúresin damytý qorynyń baspasóz ortalyǵy habarlady.
«Bıylǵy «Qazaqstan Barysy» besinshi fınaldyq dodasynyń ótetin kúni Astana kúni merekesine oraı shildeniń 5 kúni ótedi dep josparlanǵan bolatyn. Alaıda, bul kúni Astana kúnine arnalǵan is-sharalardyń tyǵyzdyǵyna baılanysty 4 shildege aýystyryldy», delingen habarlamada.
Biraq, altyn «Taıtuıaq» pen chempıondyq belbeý ıegerin, sondaı-aq, jyldyń úzdik balýanyn anyqtaıtyn «Qazaqstan Barysy» týrnıriniń fınaldyq jarysynyń ótetin kúni ózgergenimen jarys ótetin orny ózgermegen. Aıtýly doda burynǵydaı Astana qalasyndaǵy «Saryarqa» respýblıkalyq velotreginde ótedi. Jarys saǵat 12:00-de bastalady.
Elimizdegi eń iri doda «Qazaqstan Barysy» týrnıriniń fınaldyq jarysyna kirý bıletteri kelesi aptadan bastap satyla bastaıdy. Bılet satylatyn oryndar «Qazaqstan Barysy» qazaq kúresin damytý qorynyń resmı saıtynda jarııalanady.
Jobany uıymdastyrýshylar: Qazaqstan Respýblıkasynyń Tuńǵysh Prezıdenti - Elbasynyń qory, «Nur Otan» partııasy, Qazaqstan Respýblıkasynyń Mádenıet jáne sport mınıstrligi, Astana qalasy ákimdigi, «Astana» Prezıdenttik kásibı sport klýby, QR qazaq kúresi federatsııasy, «Qazaqstan Barysy» qazaq kúresin damytý qory.
Kúnsultan Otarbaı
