«Qazaqstan Barysy» týrnıri tikeleı efırden kórsetiledi
NUR-SULTAN. QazAqparat - Qazaq kúresinen «Qazaqstan Barysy» respýblıkalyq týrnırin «Qazaqstan» jáne «Qazsport» telearnalary tikeleı efırde kórsetedi, dep habarlaıdy QazAqparat tilshisi.
8 maýsymda Nur-Sultan qalasy «Barys-arena» muz aıdynynda QR tuńǵysh Prezıdenti júldesi úshin qazaq kúresinen «Qazaqstan barysy» respýblıkalyq týrnıri ótedi. Jarys kúni saǵat 13:00-de jerebe tartý rásimi ótip, sondaı-aq kontserttik baǵdarlama men tamasha shoý uıymdastyrylmaq.
Uıymdastyrýshylar osy ýaqytqa deıin aıtqandaı, fınaldyq básekede elimizdiń túkpir-túkpirinen kelgen 35 balýan beldesedi. Bıylǵy jarystyń júlde qory da qomaqty. Jeńimpazǵa 25 mıllıon teńgeden bólek, altyn belbeý men altynnan quıylǵan aýyspaly «Taıtuıaq» tabys etiledi. ІІ jáne ІІІ orynǵa ıe bolǵan sportshylarǵa sáıkesinshe 5 mıllıon 500 myń jáne 1 mıllıon 800 myń teńge beriledi. Sonymen qatar palýandarǵa ár jeńisi úshin 100 myń teńge aqshalaı syılyq tabystalady.
«Elordada ótetin saıysty «Qazaqstan» jáne «Qazsport» telearnalarynan 8 maýsym kúni saǵat 12:45-ten bastap kórýge bolady», - dep habarlaıdy «Qazaqstan» RTRK baspasóz qyzmetinen.
QR qazaq kúresi federatsııasynyń prezıdenti Arman Shoraev atalmysh saıysta qaı balýandardyń qatysatynyn aıtqan edi.
«Byltyr «Qazaqstan barysy» atanǵan palýanymyz Erjan Shankeev bıylǵy týrnırge eshqandaı irikteýsiz qatysady. Aıbek Nuǵymarov ta Shyǵys Qazaqstan oblysynan irikteýden ótti. Jobamyz áleýmettik lıftige aınalsa eken dep jumysty qolǵa aldyq. Qudaıǵa shúkir, oıymyz júzege asty. Balýanymyz Aıbek Nuǵymanov Semeı qalasyndaǵy eń úlken kolledjdiń dırektory bolyp taǵaıyndaldy. Beıbit Ystybaev baýyrymyzda dál solaı. Ol óziniń týǵan jeri Jambyl oblysynda basshylyq qyzmette. Osy jigitter juldyzǵa aınalyp, tanymaldylyqqa ıe boldy. Qudaıǵa shúkir maqsatymyzǵa jettik», - dedi Arman Shoraev.
