«Qazaqstan Barysy» týrnıri «Boets» arnasy arqyly barsha álemge translıatsııalanbaq
ASTANA. QazAqparat - «Qazaqstan Barysy» týrnırin tamashalaýǵa barsha álemge taraıtyn «Boets» arnasynyń dırektory Sergeı Zavıleıskıı kelmek.
Bul týraly búgin joba avtory Arman Shoraev málim etti.
«Bizge álemniń eń iri sport telearnalarynyń biri sanalatyn «Boets» arnasynyń dırektory Sergeı Zavıleıskıı keledi. Ol - bizdiń eski dosymyz. Sonymen qatar biz ózge de halyqaralyq meımandardy kútýdemiz. Karate-dodan tanymal akınavalyq senseı Morıo Hıgaonna (10-shy dan) qonaqqa keledi degen jospar bar. Ádette onyń artynan 30-40 japondyq tilshi erip júredi», - deıdi A. Shoraev.
Onyń aıtýynsha, «Boets» arnasy týrnırdi tikeleı efırde kórsetetin bolady. Qazaqstandyq arnalardan KAZSport translıatsııa jasamaq.
Aıta keteıik, 2010 jyldan beri ótkizilip kele jatqan ulttyq joba halyqtyń súıikti týrnırlerdiń birine aınaldy. Byltyr dodanyń jeńimpazy bolyp Shyǵys Qazaqstan oblysynyń ókili Aıbek Nuǵymarov atanǵan bolatyn. Bıyl týrnırdiń bas júldesine 28 palýan talasady dep kútilýde.
