«Qazaqstan Barysy» tóreshileriniń bir kúndik jumysyna 900 myń teńge tólenedi
ASTANA. QazAqparat - «Qazaqstan Barysynda» ádil tórelikti qamtamasyz etý úshin tóreshilerge qomaqty qarjy tólenedi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qazaq kúresi federatsııasynyń prezıdenti Arman Shoraev málim etti.
«Týrnırge irikteý kezeńinde «Nur Otan» partııasy bizge jaqsy kómektesýde. Partııa ókilderiniń aýdandyq, qalalyq, oblystyq deńgeıdegi qadaǵalaýy arqasynda sybaılas jemqorlyqqa jol bermeı kelemiz. Árıne, sybaılas jemqorlyqty júz paıyz jeńý múmkin emes, alaıda buǵan jol bermeýdiń sharalaryn barynsha atqaryp jatyrmyz», - dedi Shoraev.
Onyń sózine qaraǵanda, byltyrǵy tájirıbede balýandar men kórermenderdiń tarapynan jaqsy pikirge ıe bolǵan tóreshiler bir jyl boıy ótken jarystarda iriktelindi.
«Keıin biz jerebe tartý ádisimen osy 20 adamnyń arasynan altaýyn irikteımiz. ıAǵnı olar dodanyń bastalýyna tek bir táýlik qalǵanda ǵana tóreshi bolatyndyǵyn biledi. Biz árbir tóreshiden kepilzat retinde 200 myń teńgeden aldyq jáne olardyń jumysy aıaqtalǵannan keıin kelizattaryn qaıtaryp berdik, sondaı-aq bir kúndik jumys úshin ár tóreshige 900 myń teńgeden tóledik. Bul az aqsha emes, sonymen qatar bul soma olardyń túrli azǵyrtýlarǵa kónbeıtindiginiń kepili. Bıyl da osy júıe qoldanylady»,- dedi federatsııa basshysy.
