«Qazaqstan Barysy»: Shymkenttiń atynan taǵy 2 balýan qosyldy

ASTANA. QazAqparat - Bıylǵy «Qazaqstan Barysy» týrnırinde Ońtústik Qazaqstan oblysynyń atynan iriktelgen balýandar Túrkistan oblysynyń namysyn qorǵaıtyn boldy. Osyǵan baılanysty, Shymkent qalasynyń atynan týrnırge taǵy eki balýan qosylmaq. Bul jaıly búgingi Astanadaǵy Ortalyq kommýnıkatsııalar ortalyǵynda ótken baspasóz máslıhatynda «Qazaqstan Barysy» qorynyń tóraǵasy Arman Shoraev málim etti, dep habarlaıdy QazAqparat tilshisi.

Arman Shoraevtyń aıtýynsha, osy jyly «Qazaqstan Barysy» týrnıri 8-inshi ret ótkiziledi.

«Prezıdenttiń, kóp azamattardyń, Úkimettiń, Prezıdent Ákimshiliginiń qoldaýymen ótip jatqan týrnırdi eshqandaı minge jol bermeı ótkizemiz degen senimdemiz. Týrnırdi qoldaýshylardyń, demeýshilerdiń sany jyldan-jylǵa kóbeıip keledi. Birneshe jyldan beri bizdi qoldap kele jatqan «Qazaqstan» jáne «Qazsport» arnalaryna rızashylyǵymdy bildirgim keledi. Odan qaldy, Oralbek Botpaı sekildi bizdi demep júrgen ultjandy azamattarymyz bar», - dedi Arman Shoraev.

Onyń aıtýynsha, týrnırdiń jeńimpazyna bas júldeni Prezıdent tapsyrady dep kútilýde.

«Ózderińiz biletindeı, bizde qazir respýblıkalyq mańyzy bar qala qosyldy. Osyǵan baılanysty OQO atynan irikteýden ótken balýandar Túrkistan oblysynyń atynan óner kórsetetin bolady. Al respýblıkalyq mańyzy bar jańa qalamyzdyń bıligi Shymkenttiń de atynan týrnırge shyǵa alatyndaı balýan qosýdy ótindi. Sondyqtan, týrnırge reglament engizip, 35 balýanymyzǵa taǵy eki balýan qosyldy. Olar shyraıly Shymkenttiń namysyn qorǵaıtyn bolady», - dedi Arman Shoraev.

Aıta ketsek, Qazaqstan Respýblıkasy Tuńǵysh Prezıdenti júldesi úshin, Astananyń 20 jyldyǵyna arnalǵan qazaq kúresinen «Qazaqstan Barysy» respýblıkalyq týrnıri 1 shilde kúni elordadaǵy «Barys Arena» muz saraıynda ótedi. Osymen segizinshi ret ótetin bedeldi básekege elimizdiń 14 oblysy, Almaty jáne Astana qalalarynan jáne áskerıler arasynda irikteýden ótken 37 (eki balýan jaqynda Shymkent qalasynan qosylyp otyr) úzdik balýan qatysady. Onyń ishinde byltyrǵy týrnırdiń jeńimpazy qatysýshylar sapyna irikteýsiz qosyldy.

Týrnır «Qazaqstan» jáne «Qazsport» arnalarynan tikeleı efırde kórsetiledi.

Atap óterligi, 2011 jyldan bastap «Qazaqstan Barysy» ataǵyn Ulan Rysqul, Beıbit Ystybaev, Aıbek Nuǵymarov, Muhıt Tursynov, Elaman Erǵalıev jeńip alǵan bolatyn.

Jarysqa qatysýshy balýandar Astanaǵa búgin keledi. Al 29 maýsym kúni saǵat 19:30-da resmı salmaq ólsheý rásimi belgilengen. Bas qalanyń irgeli saýda ortalyqtarynyń biri «Han Shatyrda» túıe balýandar myńdaǵan halyqtyń aldyna shyǵady. Al «Qazaqstan Barysy» týrnıri 1 shilde kúni saǵat 12:00 kezinde bastalyp, balýandar jerebe tartý rásiminen ótedi. Tartysty beldesý jeti saǵatqa sozylady.

Aıta keterligi, «Barys Arenaǵa» 11 myńǵa jýyq kórermen sııady. Jetijyldyq tájirıbege súıene otyryp, uıymdastyrýshylar «Barys Arenanyń» lyq tolatynyna senip otyr. Dástúr boıynsha jankúıerler arasynda «Renault Logan» avtokóligi oınatylady. Bıletterdi «Melomen» dúkender jelisinen jáne kassir.kz saıtynan 500 teńgeden bastap 5 myń teńge aralyǵynda satyp alýǵa bolady.

«Qazaqstan Barysy» týrnıriniń júlde qory da qomaqty. Jeńimpaz atanǵan balýanǵa altyn belbeý men altynnan quıylǵan «taıtuıaq» tabystalady. Ekinshi jáne úshinshi orynǵa sáıkesinshe kúmis jáne qola belbeý tapsyrylmaq. Ár beldesýdegi jeńis úshin balýandar 100 myń teńgeni qanjyǵasyna baılaıdy. ІІІ oryn alǵan balýanǵa 1,8 mln teńge, al onyń bapkerine 900 myń teńge tabystalady. Al ІІ oryn úshin 5,5 mıllıon teńge, onyń bapkerine 1,8 mln teńge berilmek. Týrnırde top jarǵan birinshi oryn ıegeri 25 mln teńgege ıe bolady. Al onyń bapkerine 3,5 mln teńge tapsyrylady.