«Qazaqstan barysy» sekildi aýqymdy jarystardy ótkizýge barynsha qoldaý jasalýy kerek - Elbasy
ASTANA. 22 qyrkúıek. QazAqparat - Astanada túıepalýandardyń «Qazaqstan barysy» dodasynda alǵashqy jekpe-jekteri bastaldy.
Boz kilemde 34 palýan «Qazaqstan barysy» ataǵyna talasady. Týrnırdiń basty júldesi - QR Ulttyq banki quıǵan «Altyn taıtuıaq» kýbogi jáne Altyn belbeý. Oǵan qosa, jeńimpaz 24 mln. teńge men 6,5 mln. teńge turatyn Hıýndaı Sonata kóligin ıelenedi. Ekinshi, úshinshi oryn alǵandar kúmis pen qola medal jáne aqshalaı syıaqy alady.
Ashylý saltanatynda QR Sport jáne dene shynyqtyrý isteri agenttiginiń tóraǵasy Talǵat Ermegııaev qatysýshylarǵa Elbasy Nursultan Nazarbaevtyń quttyqtaý hatyn oqydy.
Elbasy ulttyq rýhty asqaqtatyp, jastardy otanshyldyqqa tárbıeleıtin, barsha jurtty salaýatty ómir saltyna bastaıtyn baıraqty básekege qatysyp otyrǵan barlyq palýandardy quttyqtaı kele, «Qazir elimizde 33 myńnan astam sport kesheni salynyp, jumys júrizilýde, Londonda ótken HHH Jazǵy Olımpıada oıyndarynda zor jetistikterge jettik. Elimiz sporttyq básekelerdi uıymdastyrýda mol tájirıbe jınaqtady. Byltyrǵy Qysqy Azııa oıyndary osynyń aıqyn dáleli. Sondyqtan «Qazaqstan barysy» sekildi aýqymdy jarystardy ótkizýge barynsha qoldaý jasalýy kerek. Saıypqyran erlerge sáttilik tileımin!» - dep jazdy.
Eske sala keteıik, byltyr 20 tamyzda Qazaqstanda «Qazaqstan barysy» І respýblıkalyq týrnıri 64 palýannyń qatysýymen ótkeni belgili.
Onda júlde qory 250 myń AQSh dollaryn qurady. Altyn belbeý qyzylordalyq Ulan Rysqulǵa, kúmis belbeý jambyldyq Beıbit Ystybaevqa, qola belbeý shyǵysqazaqstandyq Shalqar Jolamanovqa buıyrdy.
