«Qazaqstan Barysy» saıysynyń aqtyq synynda palýandar dopıng synamadan ótedi
ASTANA. QazAqparat - QR Prezıdenti Nursultan Nazarbaevtyń júldesi úshin qazaq kúresinen «Qazaqstan Barysy» respýblıkalyq tórtinshi týrnıriniń irikteý sharalary bastaldy. Bul týraly búgin Astanada ótken baspasóz máslıhatynda QR Sport jáne dene shynyqtyrý agenttiginiń tóraǵasy Tastanbek Esentaev málim etti.
Onyń aıtýynsha, salmaǵy 80 keliden joǵary, jasy 18-ge tolǵan árbir palýannyń «Qazaqstan Barysy» jobasynda baq synaýǵa múmkindigi bar.
«Búginde qazaq kúresimen Qazaqstan boıynsha 35 myńnan astam balalar men eresekter aınalysady. Olarmen 500-den astam jattyqtyrýshylar eńbek etýde»,- deıdi agenttik basshysy.
Belgili bolǵandaı, «Qazaqstan Barysy» týrnıriniń irikteý jarysynyń birinshi kezeńi 31 naýryzǵa deıin aýyldarda ótedi, al ekinshi kezeń aýdandyq jáne qalalyq dárejede sáýir aıy boıy uıymdastyrylady. Úshinshi kezeńinde oblystyq irikteý jarystary 1-20 mamyr aralyǵynda ótse, týrnırdiń aqtyq syny 29 maýsymda Astanadaǵy «Saryarqa» respýblıkalyq velotreginde ótedi.
T.Esentaevtyń sózine qaraǵanda, respýblıkalyq aqtyq saıysqa qatysatyn palýandar arasynda bıylǵy 25-30 mamyr aralyǵynda Almatyda 5 kúndik oqý-jattyǵý jıyny ótkiziledi. Jıyn barysynda sońǵy saıysqa iriktelgen palýandar úshin tereńdetilgen medıtsınalyq tekserý, dopıng-synama, foto-beıne túsirilimder uıymdastyrylady.
