«Qazaqstan Barysy» saıysyndaǵy tóreshiler sany qysqartyldy - QR Sport jáne dene shynyqtyrý isteri agenttigi
ASTANA. QazAqparat - QR Prezıdenti Nursultan Nazarbaevtyń júldesi úshin qazaq kúresinen «Qazaqstan Barysy» respýblıkalyq tórtinshi týrnırine ózgerister engizildi. Bul týraly búgin Astanada ótken baspasóz máslıhatynda QR Sport jáne dene shynyqtyrý isteri agenttiginiń tóraǵasy Tastanbek Esentaev málim etti.
«Ótken jylǵy týrnırde 12 tóreshi bolsa, biz ony 6-ǵa deıin qysqartyp otyrmyz. Atap aıtqanda, bıyl Qazaqstanda ótip jatqan chempıonattarynda bizdiń tóreshilerimiz emtıhan tapsyratyn bolady. Sol emtıhan arqyly eń ádil ári saýatty tóreshilerimiz anyqtalyp, altaýy «Qazaqstan Barysyna» tórelik etedi», - dedi agenttik basshysy. T. Esentaevtyń sózine qaraǵanda, synaqtan ótken tóreshiler árqaısysy 1 myń AQSh dollary kóleminde ózderiniń qaltarynan aqshalaryn salatyn bolady. «Tóreshilik etken kezde qatesi bolmaı, barlyǵy durys júrgizilse, onda tóreshiniń aqshasy qaıtarylyp, onyń ústine 5 myń dollar kóleminde tólemaqy jasalady. Osyndaı sheshim arqyly biz tóreshilerdiń ádil bolýyna bundaı jaǵdaı jasap otyrmyz. Byltyrǵydaı qazylar alqasy bolmaıdy. Sondyqtan qazaq kúresin Olımpıada oıyndarynyń baǵdarlamasyna kirgizý josparymyzda bolǵannan keıin, týrnırdi halyqaralyq federatsııalardyń erejelerine sáıkes ótkizýimiz kerek. Osy oraıda Bas tóreshi jáne alty tóreshi atalǵan aıtýly dodaǵa tórelik etedi», - dedi agenttik tóraǵasy. Budan bólek, ekinshi ózgeris palýan bapkerlerine syıaqy tóleý máselesine qatysty boldy. «Jeńimpaz palýannyń bapkerine 50 myń AQSh dollary kóleminde qarjy berilgen edi. Bıyl ony 20 myń dollarǵa deıin qysqartyp otyrmyz», - dedi T. Esentaev. Aıta keteıik, «Qazaqstan Barysy» týrnıriniń irikteý jarysynyń birinshi kezeńi 31 naýryzǵa deıin aýyldarda ótedi, al ekinshi kezeń aýdandyq jáne qalalyq dárejede sáýir aıy boıy uıymdastyrylady. Úshinshi kezeńinde oblystyq irikteý jarystary 1-20 mamyr aralyǵynda ótse, týrnırdiń aqtyq syny 29 maýsymda Astanadaǵy «Saryarqa» respýblıkalyq velotreginde ótedi.
