«Qazaqstan Barysy» respýblıkalyq týrnırinen bes balýan shettetildi
ASTANA. QazAqparat - Ult Kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» respýblıkalyq týrnıriniń uıymdastyrýshylary bıylǵy fınaldyq synnan bes balýannyń shettetilgendigin resmı túrde málimdedi.
Bul týraly «Qazaqstan Barysy» qazaq kúresin damytý qorynan habarlady.
«Qazaqstan Barysy» týrnırin ótkizý Reglamentiniń «ІV. Jarystyń ótkizilý tártibi» tarmaǵynda kórsetilgen talapqa sáıkes aýyldyq, aýdandyq irikteý syndarynan ótpegen Qostanaı oblysynyń balýany Ǵabıt Balǵynbaev týrnırdiń fınaldyq básekesine qatysý quqyǵynan aıyryldy. Uıymdastyrý komıteti tarapynan júrgizilgen tekserý sharalary nátıjesinde Ǵabıt Balǵynbaev oblystyq ІІІ irikteý jarysyna jergilikti sport basqarmasy basshylarynyń sheshimi boıynsha jiberilgendigi anyqtaldy.
Sonymen qatar, reglamenttiń atalǵan tarmaǵyndaǵy talapqa saı balýandar ózderi resmı túrde tirkelgen oblystyń irikteý syndaryna ǵana qatysýǵa quqyly. Turǵylyqty mekenjaıy boıynsha Arqalyq qalasynda tirkelgen Ǵabıt Balǵynbaev Astana qalasynda uıymdastyrylǵan irikteý synyna qatysyp, reglamenttiń taǵy bir shartyn buzǵan.
Atalǵan dáıekterge súıene otyryp, Qor Ǵ.Balǵynbaevty Ult Kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» respýblıkalyq týrnıriniń fınaldyq synynan shettetý týraly sheshim qabyldady.
Sonymen qatar, «Dopıngke qarsy ulttyq ortalyǵy» MM-niń 2014 jylǵy 20-shy maýsymdaǵy dopıngtik synama qorytyndysyna sáıkes qan quramynda dopıngtik zat anyqtalǵan Batys Qazaqstan oblysynyń balýany Damır Qalaqov, Qostanaı oblysynyń balýany Mıhaıl Tverdohlebov, Astana qalasynyń balýany Nurǵalı Baıtaraqov jáne Mańǵystaý oblysynyń balýany Manas Imanqulov fınaldyq básekeden shettetiledi.
Osyǵan oraı, 2014 jylǵy «Qazaqstan Barysy» jobasynyń aqtyq dodasynda 28 balýan baq synaıtyn bolady.
Týrnırdiń 29 maýsymda, Astana qalasyndaǵy «Saryarqa» respýlıkalyq velotreginde, saǵat 13:00-de bastalatyndyǵyn esterińizge salamyz.
Jobany uıymdastyrýshylar: «Qazaqstan Barysy» qazaq kúresin damytý qory, «Astana» KPSK, «Nur Otan» partııasy, QR Sport jáne dene shynyqtyrý isteri agenttigi, Astana qalasynyń ákimdigi.
Bas demeýshi: «Samuryq-Qazyna» Ulttyq ál-aýqat qory AQ.
Demeýshiler men seriktester: «Kaspi Bank» AQ, «SAT&Company» AQ, «Qazaqtelekom» AQ, Astana Motors «Hyundai» saýda belgisimen, «PetroQazaqstan» AQ, «QazAgro»UBH», «Arena S» JShS «Sulpak» saýda belgisimen, Daco Motors Kazakhstan YOKOHAMA saýda belgisimen, «Nur Medıa» holdıngi, «Qazaqstan» telearnasy.
Joba ıdeıasynyń avtory - Arman Shoraev.
