«Qazaqstan barysy»: Qostanaı óńiriniń myqty balýany anyqtaldy

QOSTANAI. QazAqparat - «Eńbek rezervi» sport kesheninde qazaq kúresinen Elbasy Nursultan Nazarbaevtyń júldesi úshin «Qostanaı qyrany» oblystyq irikteý týrnıri márege jetti, dep habarlaıdy QazAqparat.

Aıta ketý kerek, bul jarys bıyl segizinshi ret uıymdastyrylyp otyr. Aldymen, aýdan, qalalardyń balýandary óz óńirlerinde irikteý týrnırin ótkizdi. Sodan jeńip shyqqan balýandar fınaldyq kezdesýge jınaldy.

Eki kúnge sozylǵan dodada balýandar segiz salmaq dárejesi boıynsha beldesti.
«Túıe palýan» básekesine 20-dan astam tarta balýan tirkeldi. Tartysty ótken jarystyń fınalynda qazaq kúresinen sport sheberi Ǵabıt Balǵynbaev pen birneshe márte oblys chempıony Asylbek Ábdirovtiń joly túıisti. Jankúıerlerdiń qyzý qoldaýyna ıe bolǵan fınaldyq kezdesý tájirıbeli Balǵynbaevtyń paıdasyna sheshildi.

Endi osy eki palýan oblys namysyn respýblıkalyq «Qazaqstan barysy» týrnırinde qorǵaıtyn bolady. Úshinshi oryndy jas balýan Dáýlethan Qosmaǵambetov ıelendi.
«Osymen ekinshi márte «Qostanaı qyrany» ataǵyn ıelendim. Biraq, bul jolǵy jeńis ońaılyqpen kelmedi. Qarsylastarymnyń bári myqty. Ásirese, Abylaıhan Qasymhan men Talǵat Jıentaevtyń daıyndyǵy jaqsy edi», - deıdi jarys jeńimpazy.
Qostanaı oblysy ákiminiń orynbasary Marat Júndibaev «Qostanaı qyranyna» 300 myń teńgeniń sertıfıkatyn tapsyrdy.