«Qazaqstan Barysy» dodasyn álem boıynsha jarty mıllıardtan astam kórermen tamashalaıdy - A.Shoraev
ASTANA. QazAqparat - «Qazaqstan Barysy» dodasyn álem boıynsha jarty mıllıardtan astam adam tamashalaıdy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qazaq kúresi federatsııasynyń prezıdenti Arman Shoraev málim etti.
«Qazirgi kezde týrnırdi respýblıkadaǵy eń úlken ulttyq arna «Qazaqstan» men «KAZSport» translıatsııalaıdy. Byltyrǵy reıtıngke súıenip aıtatyn bolsam, tek Qazaqstanda 5-6 mln. kórermen tamashalady. Meniń oıymsha, alty saǵatqa sozylatyn translıatsııa úshin bul óte jaqsy kórsetkish», - dedi A.Shoraev.
Onyń aıtýynsha, 37 elge taraıtyn «Boets» telearnasynyń arqasynda týrnırdi álem boıynsha taǵy 250 mln. adam tamashalaýǵa múmkindik almaq.
Budan bólek, aıtýly dodany kórsetýge birneshe arnalary, sondaı-aq Internet telearnalar qosylady dep kútilýde.
«Sondyqtan da bizdiń týrnırdi barsha álem boıynsha jarty mıllıardtan astam kórermen tamashalaıdy», - Shoraev.
Osymen besinshi márte jalaýy jelbireıtin bıylǵy «Qazaqstan Barysy» týrnıriniń irikteý syndary elimizdiń barlyq aımaǵynda máresine jetip, júzden júırik atanǵan eń myqty 33 balýan shildeniń 4-i kúni Astanada ózara beldesedi.
Atalǵan týrnır aıasyndaǵy irikteý tórt kezeńde ótti. Birinshi kezeńdegi irikteýler aǵymdaǵy jyldyń sáýir boıy aýyldar men eldi mekenderde, ІІ kezeń - aýdandyq, qalalyq irikteýler 1-15 mamyr aralyǵynda, III kezeń - oblystyq irikteýler 20 mamyrǵa deıin boldy, sondaı-aq sońǵy kezeń - aqtyq syn. Oǵan qatysatyn balýandar arasynda 19-23 mamyr aralyǵynda Almaty qalasynda oqý-jattyǵý jıyny ótkizildi.
