«Qazaqstan barysy» Aıbek Nuǵymarov eń basty armanyn aıtty

NUR-SULTAN. QazAqparat - Eki dúrkin «Álem barysy», al keshe eki dúrkin «Qazaqstan barysy» atanǵan balýan Aıbek Nuǵymarov elordadaǵy Oqýshylar saraıyndaǵy № 58 saılaý ýchaskesinde daýys berdi, dep habarlaıdy QazAqparat tilshisi.

«Qazaqstan barysy» saılaýdan bir kún buryn ótetindigi habarlanǵan bolatyn. Sondyqtan elordadaǵy Oqýshylar saraıynda daýys berýge tirkeldik. Búgingi kún mańyzdy ekenin aıtpasa da túsinikti. Bul kúni qazaqtyń taǵdyry sheshiletin, bolashaǵymyz aıqyndalatyn kezeń. Búgin saılanǵan Prezıdent elimizdiń múddesin álemde qorǵaı alatynyna, naǵyz laıyqty saıasatkerge bolatynyna senimdimin», - dedi sportshy.

Budan bólek ol keshe ótken týrnırden keıingi pikirimen bólisti.

«Keshegi kúni buıyrtyp, «Qazaqstan barysy» atandym. Ol jerde jerebe boıynsha eń aýyr qarsylastar, ıaǵnı jeńiske múmkindigi joǵary balýandar bir jaqqa tústi. Fınalda shyǵysqazaqstandyq Erasyl Qajybaevpen shyqtym. Óte úlken ári tartysty jarys boldy dep oılaımyn», - dedi A. Nuǵymarov.

Osy oraıda ol óziniń negizgi mindetteriniń biri ulttyq kúresti keıingi urpaqqa nasıhattaý ekenin atap ótti.

«Qazirgi kezde qazaq kúresin japondardyń dzıýdo kúresi sııaqty keńinen taratýǵa úles qosqymyz keledi. Jalpy, qazaq kúresin damytýǵa memleket tarapynan qajetti qoldaý jasalyp jatqanyn sezinip otyrmyz. Bul baǵyttaǵy qadamdardy eskere otyryp, qazaq kúresi bolashaqta Olımpıada oıyndaryna enýin armandaımyn», - dedi Aıbek Nuǵymarov.

Budan buryn habarlanǵandaı, jaqynda QR Qazaq kúresi federatsııasynyń prezıdenti Arman Shoraev álemniń 29 elinde Qazaq kúresi federatsııasy ashylǵanyn málim etti.

Eske sala ketsek, elordada ótken «Qazaqstan barysy-2019» týrnırinde Aıbek Nuǵymarov jeńimpaz atandy. Fınalda ol shyǵysqazaqstandyq taǵy bir balýan Erasyl Qajybaevtan aılasyn asyrdy.

Týrnırde ekinshi jáne úshinshi oryndy Erasyl Qajybaev pen Rýslan Ábdirazaqov ıelendi.

Qazaqstan barysy atanǵan Aıbekke 25 mıllıon teńgeden bólek, altyn belbeý men altynnan quıylǵan aýyspaly «Taıtuıaq» tabys etildi. ІІ jáne ІІІ orynǵa ıe bolǵan Erasyl Qajybaev pen Rýslan Ábdirazaqovqa 5 mıllıon jáne 1 mıllıon 800 myń teńge berildi. Sonymen qatar palýandarǵa ár jeńisi úshin 100 myń teńge aqshalaı syılyq tabystaldy.

Aıta keterligi, Aıbek Nuǵymarov 2013 jyly da «Qazaqstan barysy» atanǵan bolatyn.