«Qazaqstan Barysy» atanǵan balýannyń inisi 2020 jylǵa deıin sporttan shettetildi
ASTANA. QazAqparat - 2014 jylǵy «Qazaqstan Barysy» atanǵan Muhıt Tursynovtyń inisi Nursultan Tursynov 2020 jylǵa deıin sporttan shettetildi, dep habarlaıdy QazAqparat tilshisi informburo.kz saıytyna silteme jasap.
Grek-rım kúresinen el namysyn qorǵap kelgen Azııa chempıony Nursultan Tursynov tyıym salynǵan meldonıı preparatyn qoldanyp, dopıngke qarsy erejeni buzǵan.
Sol sebepti Birikken kúres álemi Nursultan Tursynovty 2020 jyldyń 3 naýryzyna deıin sporttan shettetkeni belgili boldy. Biraq, bul oqıǵa týraly Qazaqstan kúres federatsııasy arnaıy málimdeme jasaǵan joq.
Eske sala keteıik, Nursultan Tursynov - qazaq kúresindegi tanymal bapker Shyńǵys Tursynovtyń uly. Nursultannyń týǵan aǵasy Muhıt Tursynov -«Qazaqstan Barysy» týrnıriniń chempıony.
Nursultan Tursynov «Qazaqstan prezıdenti kýbogy» halyqaralyq týrnıriniń eki dúrkin qola (2012, 2013 jyldary) jáne kúmis (2015 jyly) júldegeri, Azııa chempıony (2014 jyly), Ispanııa gran-prıiniń jeńimpazy (2014 jyly), Azııa chempıonatynyń kúmis júldegeri (2015 jyly), Bolat Turlyhanovty eske alýǵa arnalǵan halyqaralyq týrnırdiń jeńimpazy (2015 jyly).
