«Qazaqstan Barysy»: A.Nuǵymarov 1-shi aınalymda súrinip, kelesi aınalymda M.Tursynov pen B.Ystybaev kezdesetin boldy
ASTANA. QazAqparat - Astanadaǵy «Saryarqa» velotreginde ótip jatqan Ult kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» V respýblıkalyq týrnıri boıynsha ekinshi aınalymǵa ótken palýandar aıqyndaldy.
Boz kilemdegi beldesýde suraptalyp, sytylyp shyqqandar kil myqtylar bolyp otyr. Balýandardyń kelesi aınalymy da asa tartysty ótpek. Óıtkeni, bul joly «Qazaqstan Barysy» ataǵynan eki basty úmitker - Muhıt Tursynov pen Beıbit Ystybaev kezdesetin bolyp otyr. Aıta keteıik, qalyptasqan ereje boıynsha «Qazaqstan Barysy» týrnırine elimizdiń ár aımaǵynan iriktelgen 32 balýan men byltyrǵy jylǵy jarystyń jeńimpazy Muhıt Tursynov joldama alǵan bolatyn. Osyǵan oraı, eki topta bólinip kúresken palýandardyń on altysy kelesi ekinshi aınalymǵa ótti. Kelesi aınalymǵa ótkender arasynda 2012 jylǵy chempıon Beıbit Ystybaev, qaraǵandylyq Erjan Shynykeev, byltyrǵy fınalǵa shyǵyp, ekinshi orynǵa ıelengen Asyl Bármenov, qyzylordalyq Rústem Ábdirazaqov, salmaǵy eń aýyr palýan shymkenttik Jumanazar Ersultanovtar bar. Aıta keterligi, birinshi aınalym barysynda eń qyzý tartys 2013 jylǵy «Qazaqstan Barysy» Aıbek Nuǵyramov pen 2014 jylǵy chempıon Muhıt Tursynovtyń arasynda ótti. Ekeýi de Shyǵys Qazaqstan oblysynyń arlandary. Birinshi aınalymda eki palýannyń arasyndaǵy qyzý tartys barysynda eki palýan negizgi ýaqytta bir-birin ala almady. Qosymsha beldesý kezinde boz kilemnen Aıbek Nuǵymarovtyń aıaǵy shyǵyp ketip, Muhıt Tursynov jeńiske jetti. Ol kelesi aınalymǵa ótti. Osylaısha, jerebeniń túsýine oraı Aıbek Nuǵymarov birinshi aınalymnan-aq súrindi. Endi Muhıt Tursynov pen Beıbit Ystybaev jolyǵatyn boldy. Eske sala keteıik, «Qazaqstan Barysy» V respýblıkalyq týrnıriniń júlde qory 225 000 AQSh dollaryn quraıdy. Onyń ishinde 35 myń AQSh dollary sportshylardyń jattyqtyrýshylaryna taǵaıyndalǵan. Júlde qory tómendegideı: 1-oryn - 150 myń AQSh dollary; 2-oryn - 30 myń AQSh dollary; 3-oryn - 10 myń AQSh dollary.
