«Qazaqstan barysy-2016» jarysynyń jeńimpazy 25 mln teńge men páter ıelenedi
ASTANA. QazAqparat - «Qazaqstan barysy» respýblıkalyq jarysynyń bıylǵy jeńimpazy 25 mln teńge, jeńil avtokólik pen Astanadan páter ıelenedi. Bul týraly búgin qazaq kúresi boıynsha «Qazaqstan barysy-2016» respýblıkalyq týrnırine arnalǵan baspasóz máslıhatynda «Qazaqstan barysy» qazaq kúresin damytý qory qamqorshylyq keńesiniń tóraǵasy, qazaq kúresi federatsııasynyń prezıdenti Arman Shoraev málim etti.
«Ózderińiz biletindeı, irikteý kezeńderi aýyl men aýdandardan bastaldy. Osylaısha, 14 oblys, Astana jáne Almaty qalalarynan eki-eki balýan «Qazaqstan barysy-2016» dodasyna ótti. Taǵy bir aıta keterligi, bıyl tarıhta birinshi ret áskerı qyzmetkerler arasynda «Ásker barysy» týrnıryn ótkizgen edik. Sonyń jeńimpazy 33-inshi balýan retinde «Qazaqstan barysy» týrnıryna qatysady»,-dep habarlady A.Shoraev.
Onyń aıtýynsha, týrnırdyń bıylǵy júlde qory 42 mln teńgeni qurap otyr. Onyń ishinde, 25 mln teńge birinshi oryn alǵan balýanǵa buıyrady.
«Bıyl elimizdiń ekonomıkalyq jaǵdaıy qolaıly bolmasa da, soǵan qaramastan búkil kúshimizi salyp, týrnırdyń bas demeýshisi «Samuryq-Qazyna» ál-aýqat qorynyń arqasynda júlde qorymyz 42 mln teńgeni qurap otyr. Sonyń ishide, birinshi oryn alǵan balýanǵa 25 mln teńge, jeńil avtokólik pen Astanadan páter tigip otyrmyz»,-dep habarlady A.Shoraev.
Aıta keteıik, «Qazaqstan barysy-2016» týrnırynyń fınaly 3 shilde kúni «Saryarqa» velotreginde ótedi. Kórermender arasynda avtokólik oınatylady. Balýandar jarysyn ««KazSport»» arnasy, Túrkııanyń «TRT Avaz» arnasy men Reseıdiń «Match!Boets» arnasy tikeleı efırden kórsetedi.
