«Qazaqstan Barysy-2015»: Fınalǵa B.Ystybaev pen R.Ábdirazaqov shyqty
ASTANA. QazAqparat - Astanadaǵy «Saryarqa» velotreginde ótip jatqan Ult kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» V respýblıkalyq týrnırine fınalǵa shyqqan qos palýan anyqtaldy. Olar - Rýslan Ábdirazaqov pen Beıbit Ystybaev.
Jartylaı fınalda aldymen Rýslan Ábdirazaqov pen Jumanazar Ersultanov beldesip, qyzylordalyq Rýslan Ábdirazaqov sońǵy sekýndtarda jeńisti qoldan julyp alǵan. Al Ǵanı Seıdildaev pen Beıbit Ystybaev arasyndaǵy jekpe-jekte Beıbit Ystybaev taza jeńispen basymdyq tanytty.
Aıtýly dodany QR Prezıdenti Nursultan Nazarbaev tamashalaýda. Bul týrnırdi Qazaqstannyń ulttyq arnasy men «Kazsport», sondaı-aq Túrkııanyń «TRT» arnasy jáne Reseıdiń «Boets» arnasy da tikeleı efırde taratýda.
