«Qazaqstan Barysy-2015» atanǵan Beıbit Ystybaevqa QR Prezıdenti atynan tósbelgi tabystaldy (FOTO)
Qurmet belgisin palýanǵa QR Mádenıet jáne sport mınıstri Arystanbek Muhamedıuly tabystady.
«Sizdi «Qazaqstan Barysy-2015» respýblıkalyq týrnırindegi jeńisińizben quttyqtaımyn. Sizge jastarǵa úlgi bolyp júrgenińiz úshin alǵys bildiremin, ózińizge, otbasyńyzǵa myqty densaýlyq tileımin. Armandaryńyz oryndala bersin», - dep quttyqtaý gramotasyn oqyp berdi mınıstr. Óz kezeginde A.Muhamedıuly týrnırde B.Ystybaev sheberligin ǵana emes, alǵa jyljýǵa degen qushtarlyǵyn pash etkenin atap ótti. - Astana kúni aıasynda «Qazaqstan Barysy-2015» týrnıri ótip, Memleket basshysy Beıbit Ystybaevqa gran-prı tabystaǵany qandaı tamasha. Elbasy Qazaqstan bolashaqqa senimdi qadam basyp kele jatqan ıntellektýaldy el bolýy tıis ekenin únemi aıtyp keledi. Ol úshin jastar sport pen mádenıetke kóńil bólip, rýhanı baı bolýy tıis. Sonda memleketimiz «Máńgilik El» atanýǵa laıyq bolmaq, - dedi A.Muhamedıuly. Eske salaıyq, 4 shilde kúni B.Ystybaev «Qazaqstan Barysy-2015» respýblıkalyq týrnıriniń fınalynda qyzylordalyq Rýslan Ábdirazaqovtan basym tústi. Jeńimpaz 150 myń dollar kólemindegi syılyq pen chempıondyq belbeýge jáne altyn taıtuıaqqa ıe boldy.
