«Qazaqstan barysy-2014» júldegeri dzıýdodan álem chempıonatyna qatysady
ASTANA. QazAqparat - Qazaqsha kúresten «Qazaqstan barysy-2014» týrnırinde úshinshi oryn alǵan Rýslan Ábdirazaqov dzıýdodan álem chempıonatyna ulttyq qurama sapynda qatysatyn boldy, dep habarlady Sporttyq jekpe-jek jáne kúsh qoldanylatyn sport túrleri konfederatsııasynyń baspasóz qyzmetinen.
Dzıýdodan Qazaqstannyń erler quramasynyń jattyqtyrýshylar shtaby tamyzdyń 25-31 aralyǵynda Chelıabide ótetin álem chempıonatyna qatysatyn qurama sapyn anyqtady. Sonymen el namysyn baıraqty básekede myna palýandar qorǵaıtyn bolady: 60 kelide - Aıbek Imashev (Aqtaý), Erkebulan Qosaev (ShQO); 66 kelide - Sergeı Lım, Eldos Jumaqanov (ekeýi de Almatydan), Jansaı Smaǵulov (Qaraǵandy); 73 kelide - Ertýǵan Torenov (Taraz); 81 kelide - Rınat Ibragımov (BQO); 90 kelide - Samat Esen (OQO); 100 kelide - Maksım Rakov (Qaraǵandy), Ádilhan Qozybaev (Qyzylorda); + 100 kelide - Rýslan Ábdirazaqov (Qyzylorda).
Chelıabide ótetin álem chempıonaty álemniń barlyq dzıýdoısteri bas qosatyn basty jarys sanalady. Qurama komandalar bul baıraqty básekege eń úzdik sportshylaryn aparady.
Aıta keteıik, Rýslan Ábdirazaqov 2010 jyly Qazaqstan barysy atanǵan Ulan Rysquldyń týǵan inisi. Rýslan aǵymdaǵy jyly qazaqsha kúresten ótken týrnırde Muhıt Tursynovqa ese jibergen bolatyn. Al M.Tursynov osy jyly Qazaqstan barysy ataǵyn jeńip alǵan edi. Degenmen, Rýslan dál osy týrnırde úshinshi oryndy ıelengeni este.
