«Qazaqstan Barysy-2013» jeńimpazy bıyl da óz ataǵyn qorǵap qalmaqshy
ASTANA. QazAqparat - «Qazaqstan Barysy-2013» jeńimpazy Aıbek Nuǵymarov 2014 jyly da óz tıtýlyn qorǵaýǵa jan-jaqty daıynmyn dep sanaıdy, dep habarlady Vesti.kz.
«Kóńil-kúıim óte jaqsy, bári de orynsha», - dedi Nuǵymarov - Endi daıyndyqtyń eń mańyzdy kezeńi qaldy, fınalǵa deıin bir aı bar. Astanada qyzý kúres bolady dep kútemin, ár qarsylas ózinshe myqty, nátıjesi kilem ústinde sheshiledi. Sátti aıaqtalatynyna senimdimin».
Nuǵymarovtyń aıtýynsha, bul tıtýldy qatarynan ıelený ońaı sharýa emes.
«Árıne, qıyn. Bul úshin burynǵyǵa qaraǵanda, eki-úsh ese kóbirek daıyndalýyń qajet. Kesip-pishkim kelmeıdi. Bári de qarsylastarymnyń daıyndyǵyna baılanysty sheshiledi, olar múmkinshilik berse, jeńemin!», - deıdi ol.
Aıta keteıik, «Qazaqstan Barysy-2014» saıysynyń aqtyq syny Astanada 29 maýsymda ótedi. Dástúr boıynsha jeńimpaz chempıon beldigin, «Taıtuıaq» oljasyn jáne 150 myń dollardy ıelenedi. Fınalǵa 33 palýan qatysady, olardyń 14-i - óńirlerden, Almaty jáne Astana qalalarynan eki-eki ókilden jáne qazirgi chempıon qatysady. Sońǵy synǵa shyqqandar Almatyda 22 mamyrda tanystyryldy.
