Qazaqstan barlyq arab elderimen dostyq qatynas ornatty - QR SІM basshysy

ASTANA. QazAqparat - QR Syrtqy ister mınıstri Qaırat Ábdirahmanov Birikken Arab Ámirlikteriniń Densaýlyq saqtaý jáne áleýmettik qorǵaý mınıstri Abdýlrahman ál-Ýeısti qabyldady, dep habarlaıdy QazAqparat SІM-niń baspasóz qyzmetine silteme jasap.

Kezdesýde Prezıdent N.Á. Nazarbaevtyń qańtarda jáne naýryzda Ábý-Dábı men Dýbaıǵa jasaǵan saparlarynyń, sondaı-aq osy jyldyń mamyrynda BAÁ syrtqysaıası vedomstvosy basshysynyń Astanaǵa saparynyń qorytyndylary mán-mátinindegi Qazaqstan-Ámirlikter yntymaqtastyǵynyń aǵymdaǵy jaǵdaıy talqylandy. Suhbattastardyń pikirinshe, eki memlekette de áriptestikti, onyń ishinde kólik ınfraqurylymy, aýyl sharýashylyǵy, densaýlyq saqtaý, mádenıet almasý salasyndaǵy áriptestikti odan ári nyǵaıtý úshin keń múmkindikter bar. BAÁ «EKSPO-2017» kórmesine belsendi túrde qatysýda jáne «Astana» halyqaralyq qarjy ortalyǵyn damytýdaǵy ózara is-qımyl ózekti mańyzǵa ıe bolyp otyr.

Sondaı-aq Katardyń aınalasyndaǵy jaǵdaı, ıslam memleketteri ishindegi perspektıvalyq jaqyndasý, óńirlik shıelenisterdi retteý, sondaı-aq terrorızm men ekstremızmge qarsy is-qımyl týraly pikir almasyldy.

Q. Ábdirahmanovtyń pikirinshe, Qazaqstan BAÁ, Saýd Arabııasy men Katardy qosa alǵanda, barlyq arab elderimen dostyq qatynastar ornatty. Mınıstr baýyrlas elder óz halyqtarynyń ıgiligi úshin kelispeýshilikterdi jeńetinine jáne dıalog arqyly daǵdarysty retteı alatynyna senimin bildirdi.