Qazaqstan barlyq tarapty Sırııa daǵdarysyn kidirissiz sheshýge belsendi qatysýǵa shaqyrady
ASTANA. KAZINFORM – Qazaqstan barlyq tarapty Sırııa daǵdarysyn kidirissiz sheshýge belsendi qatysýǵa shaqyrady. Bul týraly atalǵan kelissózderdiń jalpy otyrysynda Syrtqy ister mınıstriniń orynbasary Álibek Baqaev málim etti.
«Búgin biz Sırııada berik beıbitshilikti ornatý jolyndaǵy mańyzdy kezeń – Astana protsesi aıasyndaǵy jumysymyzdy jalǵastyryp otyrmyz. Bul oqıǵa Sırııanyń bolashaǵy úshin ǵana emes, sonymen qatar kóptegen kúrdeli másele men qaıshylyqtarǵa tap bolǵan búkil aımaq úshin mańyzdy. Taıaý Shyǵystaǵy shıelenistiń qazirgi ýshyǵýy shekaradan tys jerlerdi qamtyp, aımaqtyq turaqtylyqqa qaýip tóndiretin jáne aıtarlyqtaı geosaıası ári ekonomıkalyq kedergiler týdyratyn eleýi táýekelderdi de qosa qozdyrady. Biz bul teketirestiń úshinshi taraptyń qatysýymen aýqymdy áskerı qaqtyǵysqa ulasý múmkindigine erekshe qyraǵylyq tanytýymyz qajet. Mundaı oqıǵalardyń saldary aımaqtyń bolashaq órkendeýi men qaýipsizdigi úshin joıqyn bolady. Osyny eskere otyryp, bizdiń barlyq múddeli tarap arasynda syndarly dıalog qalyptastyrýymyz óte mańyzdy. Saıası sheshimge umtylý aıryqsha mańyzǵa ıe. Biz berik beıbitshilik pen turaqtylyqqa jol ashýǵa baǵyttalǵan dıplomatııalyq bastamalarǵa basymdyq berýimiz qajet dep esepteımiz», - dedi Álibek Baqaev.
Onyń atap ótýinshe, osy maqsatqa jetý úshin, Sırııanyń bolashaǵyn talqylaý úshin Konstıtýtsııalyq komıtettiń otyrystaryn jandandyrý qajet. Mundaı pikirtalastar ishki saıası birlikti nyǵaıtý, ultty jarqyn jáne turaqty bolashaqqa baǵyttaý úshin óte mańyzdy.
«Sońǵy jyldary Qazaqstan Sırııa halqyn qoldap keledi jáne Sırııa daǵdarysyn retteýde belsendi ról atqarady. 2017 jyldyń qańtar aıynan bastap, Sırııa boıynsha Astana formatynda Iran, Reseı jáne Túrkııanyń deldaldyǵymen, BUU-nyń qoldaýymen kelissózder ótip keledi. Bul platforma bizge deeskalatsııa aımaqtaryn damytýǵa jáne zorlyq-zomdylyqty azaıtýǵa yqpal etetin mańyzdy kelisimderge qol jetkizýge múmkindik berdi. Qazaqstan qaqtyǵysýshy taraptardy tatýlastyrý úshin halyqaralyq yntymaqtastyqtyń óte mańyzdy ekenin túsinip, Astana protsesine beıildi bolyp qala beredi. Sırııa tarıhyndaǵy osy qaıǵyly jaıtty sheshýdiń jalǵyz joly bul – BUU jarǵysy men qararlaryna sáıkes úılestirilgen saıası jine dıplomatııalyq tásil. Qazaqstan barlyq tarapty Sırııadaǵy daǵdarysty kidirissiz sheshýge belsendi qatysýǵa, aımaqta turaqtylyq pen beıbitshilik ornatýǵa shaqyrady», - dedi mınıstr orynbasary.
Aıta keteıik, kezdesýge qatysý úshin Qazaqstan elordasyna 11 delegatsııa keldi. Sırııa Úkimetiniń kelissóz tobyna Syrtqy ister jáne ekspatrıanttar isteri jónindegi mınıstrdiń orynbasary Aıman Raad jetekshilik etse, Sırııa oppozıtsııasy atynan Ahmad Toma basshylyq etti.
Sonymen qatar kezdesýge kepilger elderdiń delegatsııalary qatysty: Reseı delegatsııasyn Sırııadaǵy jaǵdaıdy retteý boıynsha RF Prezıdentiniń arnaıy ókili Aleksandr Lavrentev, Túrkııa delegatsııasyn TR SІM-niń Ekijaqty saıası qatynastar jónindegi bas dırektory Mýstafa ıÝrdakýl, al Iran delegatsııasyn IIR SІM-niń Arnaıy saıası máseleler jónindegi kómekshisi Alı Asgar Hadjı.
Kelissózderge baqylaýshy retinde Iordanııa, Lıvan jáne Irak ókilderi, sondaı-aq halyqaralyq uıymdar – Birikken Ulttar Uıymy, BUU-nyń Bosqyndar isteri jónindegi joǵarǵy komıssarynyń basqarmasy jáne Qyzyl Krest ókilderi qatysty.
